ബംഗളൂരു: പൊലിസ് വെടിവയ്പ്പില്‍ മൂന്ന് പേര്‍ കൊല്ലപ്പെടാനിടയാക്കിയ ബംഗളൂരു സംഘര്‍ഷക്കേസില്‍ യു.എ.പി.എ, ഗുണ്ടാ ആക്ട് എന്നീ വകുപ്പുകള്‍ ചുമത്താന്‍ കര്‍ണാടക സര്‍ക്കാര്‍ തീരുമാനം.
കേസില്‍ തുടര്‍ നടപടികള്‍ സ്വീകരിക്കുന്നതു സംബന്ധിച്ച് മുഖ്യമന്ത്രി ബി.എസ് യെദിയൂരപ്പയും ആഭ്യന്തര മന്ത്രി ബസവരാജ് ബൊമ്മെയും ചര്‍ച്ച നടത്തിയതായും ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു.
സംഘര്‍ഷം നടന്ന ഡി.ജെ ഹള്ളിയില്‍ ഉണ്ടായ നാശനഷ്ടങ്ങള്‍ വിലയിരുത്താന്‍ ക്ലെയിം കമ്മിഷനെ നിയമിക്കാന്‍ അനുവാദം തേടി ഹൈക്കോടതിയെ സമീപിക്കാനും സര്‍ക്കാര്‍ തീരുമാനിച്ചു. കേസില്‍ അറസ്റ്റിലായവര്‍ക്കെതിരേ ഗുണ്ട ആക്ട്, യു.എ.പി.എ വകുപ്പുകള്‍ ചുമത്തുന്നത് സംബന്ധിച്ച് പ്രത്യേക അന്വേഷണ സംഘം ഉടന്‍ തീരുമാനമെടുക്കും.
അഖണ്ഡ ശ്രീനിവാസവ എം.എല്‍.എയുടെ അനന്തരവന്‍ ഫേസ്ബുക്കില്‍ പ്രവാചകനെ നിന്ദിക്കുന്ന പോസ്റ്റ് ഇട്ടതിനു പിന്നാലെയാണ് ബംഗളൂരുവില്‍ പ്രതിഷേധം ഉടലെടുത്തതും വെടിവയ്പ്പില്‍ കലാശിച്ചതും.
അതേസമയം സമൂഹമാധ്യമ കമ്പനികളുടെ ഇന്ത്യയിലെ മേധാവികളുമായി കര്‍ണാക സര്‍ക്കാര്‍ കൂടിക്കാഴ്ച നടത്തും. ഇത്തരം സംഘര്‍ഷങ്ങള്‍ സൃഷ്ടിക്കാനിടയാക്കുന്ന സന്ദേശങ്ങള്‍ പ്രചരിക്കുന്നത് തടയുന്നത് സംബന്ധിച്ച് യോഗത്തില്‍ ചര്‍ച്ചയുണ്ടാകും.
അതിനിടെ ബംഗളൂരുവിലെ നിരോധനാജ്ഞ ഓഗസ്റ്റ് 18 വരെ നീട്ടി. കലാപവുമായി ബന്ധപ്പെട്ട് മൊത്തം 264 പേരാണ് ഇതുവരെ അറസ്റ്റിലായത്.