തിരുവനന്തപുരം: മുഖ്യമന്ത്രിയുടെ മുന്‍ ഐ.ടി സെക്രട്ടറി ശിവശങ്കര്‍ വഞ്ചകനെന്ന് മന്ത്രി ജി.സുധാകരന്‍. ഇയാള്‍ക്ക് സ്വപ്നയുമായുള്ള സൗഹൃദം അപമാനകരമാണ്. സ്വാതന്ത്ര്യവും വിശ്വാസവും ശിവശങ്കര്‍ ദുരുപയോഗിച്ചു. മാപ്പര്‍ഹിക്കാത്ത കുറ്റമാണ് ചെയ്തത്. ആ ദുര്‍ഗന്ധം മുഖ്യമന്ത്രിയുടെ ഓഫിസില്‍ നിന്ന് തുടച്ചുമാറ്റിയെന്നും ഇപ്പോള്‍ അവിടെയുള്ളത് സുഗന്ധം മാത്രമെന്നും മന്ത്രി പറഞ്ഞു.
ശിവശങ്കറിന് സ്വര്‍ണക്കടത്തുമായി ബന്ധമുണ്ടെന്ന് തെളിഞ്ഞിട്ടില്ല. ലൈഫ് മിഷന്‍ പദ്ധതി കോണ്‍ട്രാക്ടറില്‍നിന്ന് സ്വപ്ന പണം വാങ്ങിയതിന് സര്‍ക്കാര്‍ എന്തുപിഴച്ചുവെന്ന് ചോദിച്ച മന്ത്രി രാമായണ മാസത്തില്‍ പ്രതിപക്ഷം മുഖ്യമന്ത്രിയെ രാക്ഷസീയമായ രീതിയില്‍ വേട്ടയാടുകയാണെന്നും ആരോപിച്ചു.