കൊല്‍ക്കത്ത: മാനസികനില പരിശോധിക്കണമെന്ന സുപ്രിംകോടതി ഉത്തരവ് തള്ളി കൊല്‍ക്കത്ത ഹൈക്കോടതി ജഡ്ജി ജസ്റ്റിസ് സി.എസ്.കര്‍ണന്‍.
ഉത്തരവ് ദലിത് ജഡ്ജിയോടുള്ള അവഹേളനമാണ്. ഇത്തരം ഒരു ഉത്തരവ് പുറപ്പെടുവിക്കാന്‍ സുപ്രിം കോടതിക്ക് എന്ത് അധികാരമാണ് ഉള്ളതെന്നും കര്‍ണന്‍ ചോദിച്ചു. തനിക്കെതിരായ കേസ് പരിഗണിച്ച ഏഴ് ജഡ്ജിമാരും അഴിമതിക്കാരാണെന്നും അദ്ദേഹം ആരോപിച്ചു. താന്‍ മാനസികവും ശാരീരികവുമായി ഒരു തകരാറും ഇല്ലാത്ത ആളാണെന്നു ജസ്റ്റിസ് കര്‍ണന്‍ കൂട്ടിച്ചേര്‍ത്തു.
തന്റെ അനുവാദമില്ലാതെ സുപ്രിം കോടതി ഉത്തരവ് നടപ്പാക്കാന്‍ ശ്രമിച്ചാല്‍ പശ്ചിമ ബംഗാള്‍ ഡി.ജി.പിക്കെതിരേ നടപടിയെടുക്കുമെന്നും അദ്ദേഹം മുന്നറിയിപ്പു നല്‍കി.
മെയ് അഞ്ചിന് കര്‍ണനെ കൊല്‍ക്കത്ത സര്‍ക്കാര്‍ ആശുപത്രിയില്‍ ഹാജരാക്കണമെന്നായിരുന്നു സുപ്രിംകോടതി ഉത്തരവ്. മേല്‍നോട്ടം വഹിക്കാന്‍ പശ്ചിമബംഗാള്‍ ഡി.ജി.പിയുടെ നേതൃത്വത്തില്‍ പൊലിസ് സംഘത്തെ നിയോഗിക്കണമെന്നും ചീഫ് ജസ്റ്റിസ് ജെ.എസ്.ഖെഹാര്‍ അധ്യക്ഷനായ ബെഞ്ച് ഉത്തരവിട്ടിരുന്നു.
തന്റെ മാനസികനില പരിശോധിക്കണമെന്ന് ഉത്തരവിട്ട ജഡ്ജിമാരുടെ മാനസികനില പരിശോധിക്കണമെന്ന് ജസ്റ്റിസ് കര്‍ണന്‍ നേരത്തെ ഉത്തരവിട്ടിരുന്നു. വിധി നടപ്പാക്കാന്‍ ഡല്‍ഹി ഡി.ജി.പിക്കു നിര്‍ദേശവും നല്‍കിയിരുന്നു.
ജഡ്ജിമാരെ എയിംസ് മെഡിക്കല്‍ ബോര്‍ഡിന് മുന്നില്‍ ഹാജരാക്കാനായിരുന്നു കര്‍ണന്റെ ഉത്തരവ്. മെയ് നാലിന് പരിശോധന നടത്തി എട്ടിന് റിപ്പോര്‍ട്ട് സമര്‍പ്പിക്കണമെന്നും അദ്ദേഹം നിര്‍ദേശിച്ചു. നേരത്തെ സുപ്രിം കോടതി ചീഫ് ജസ്റ്റിസടക്കം ഏഴ് ജഡ്ജിമാര്‍ക്ക് വിദേശയാത്രാ വിലക്കേര്‍പ്പെടുത്തി കര്‍ണന്‍ ഉത്തരവിട്ടിരുന്നു.
സുപ്രിം കോടതി ജഡ്ജിമാരെ പരസ്യമായി വിമര്‍ശിച്ചതിനാണു കര്‍ണനെതിരേ സുപ്രിം കോടതി കോടതിയലക്ഷ്യ നടപടി ആരംഭിച്ചത്. രാജ്യത്തെ പരമോന്നത കോടതി ഉത്തരവുകള്‍ പരസ്യമായി ജസ്റ്റിസ് കര്‍ണന്‍ തള്ളിയത് ജുഡീഷ്യറിയില്‍ പുതിയ വിവാദങ്ങള്‍ക്കാണു തുടക്കം കുറിച്ചിരിക്കുന്നത്.
തനിക്കെതിരേ നടപടിയെടുത്ത ചീഫ് ജസ്റ്റിസ് അടങ്ങുന്ന ഭരണഘടനാ ബെഞ്ചിലെ ഏഴ് ജഡ്ജിമാര്‍ 14 കോടി രൂപ നഷ്ടപരിഹാരം നല്‍കണമെന്നു കര്‍ണന്‍ ഉത്തരവിട്ടിരുന്നു. ഹൈക്കോടതി ജഡ്ജിക്കെതിരേ സുപ്രിം കോടതി അറസ്റ്റ് വാറണ്ട് പുറപ്പെടുവിച്ചതും അതിനെ ജസ്റ്റിസ് കര്‍ണന്‍ തള്ളിയതും ഇന്ത്യന്‍ നീതിന്യായവ്യവസ്ഥയില്‍ ആദ്യ സംഭവമാണ്.