വെഞ്ഞാറമൂട്: മിനിലോറികള്‍ കൂട്ടിയിടിച്ച് ഒരാള്‍ മരിച്ചു. രണ്ടുപേര്‍ക്കു പരുക്കേറ്റു. ലോറികളിലൊന്നിലെ  ഡ്രൈവര്‍ കൊല്ലം തൊടിയൂര്‍ ചേലക്കോട്ടുകുളങ്ങര അനീഷ് ഭവനില്‍ ജനാര്‍ദനന്‍-ഓമന ദമ്പതികളുടെ മകന്‍ രതീഷ് (33) ആണ് മരിച്ചത്. ഇയാള്‍ക്കൊപ്പമുണ്ടായിരുന്ന ചേലക്കോട്ടുകുളങ്ങര സ്വദേശി ശശിധരന്‍ (62), മറു ലോറിയിലെ ഡ്രൈവര്‍ വെഞ്ഞാറമൂട് മൈലയ്ക്കല്‍ മക്കാംകോണം സ്വദേശി സാബു (35) എന്നിവര്‍ക്കാണ് പരുക്കേറ്റത്.
കഴിഞ്ഞ ദിവസം രാവിലെ 5.15ന് എം.സി റോഡില്‍ ഉദിമൂട്ടിലായിരുന്നു അപകടം. പരുക്കേറ്റവരെ സ്ഥലത്തെത്തിയ വെഞ്ഞാറമൂട് പൊലിസും നാട്ടുകാരും ചേര്‍ന്ന് വെഞ്ഞാറമൂട്ടിലെ സ്വകാര്യ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചുവെങ്കിലും രതീഷിന്റെ ജീവന്‍ നഷ്ടപ്പെട്ടു. മൃതദേഹം പോസ്റ്റുമോര്‍ട്ടത്തിനുശേഷം ബന്ധുക്കള്‍ക്കു വിട്ടുനല്‍കി.