തൃശൂര്‍: യു.ഡി.ഫ് തൃശൂര്‍ ലോക്‌സഭാ മണ്ഡലം സ്ഥാനാര്‍ഥി ടി.എന്‍ പ്രതാപന്റെ പരസ്യ പ്രചാരണം കൊട്ടിക്കലാശത്തോടെ ഇന്ന് വൈകിട്ട് അഞ്ചിന് ചാവക്കാട് സമാപിക്കും. രാവിലെ ഒന്‍പത് മണിക്ക് തളിക്കുളത്ത് നിന്നാരംഭിക്കുന്ന റോഡ് ഷോ തൃപ്രയാര്‍ എടമുട്ടം, കാട്ടൂര്‍, ഇരിങ്ങാലക്കുട, മാപ്രാണം, നന്ദിക്കര, പുതുക്കാട്,ആമ്പല്ലൂര്‍, തലോര്‍, ഒല്ലൂര്‍, പടവരാട്, നടത്തറ, മണ്ണുത്തി, തൃശൂര്‍ കാഞ്ഞാണി, പാവറട്ടി വഴി ചാവക്കാടെത്തും. നൂറുക്കണക്കിന് ബൈക്കുകള്‍ അടക്കമുള്ള വാഹനങ്ങള്‍ കൊട്ടിക്കലാശത്തില്‍ അണിനിരക്കും.
വിവിധ വാദ്യമേളങ്ങളുടെ അകമ്പടിയോടുകൂടി ചാവക്കാട് നഗരത്തെ ഇളക്കിമറിച്ച് വൈകിട്ട് അഞ്ചിന് പരസ്യ പ്രചാരണം സമാപിക്കും. ടി.എന്‍ പ്രതാപന്‍ രാവിലെ ഏഴിന് ഈസ്റ്റര്‍ ആഘോഷത്തിന്റെ ഭാഗമായി ബിഷപ്പ് ഹൗസില്‍ പ്രാതല്‍ കഴിക്കും.  തുടര്‍ന്ന് ഈസ്റ്റര്‍ ആശംസ നേര്‍ന്നുകൊണ്ട് പരസ്യ പ്രചാരണത്തിനിറങ്ങും.