ചാലക്കുടി: യു.ഡി.എഫ് കണ്‍വീനറും ചാലക്കുടി മണ്ഡലത്തിലെ യു.ഡി.എഫ് സ്ഥാനാര്‍ഥിയുമായ ബെന്നി ബെഹനാന്‍ ആലുവ അദ്വൈതാശ്രമത്തിലെത്തി ശിവഗിരി മഠാധിപതി വിശുദ്ധാനന്ദ സ്വാമികളുടെ അനുഗ്രഹം തേടി. രാവിലെ അദ്വൈതാശ്രമത്തിലെത്തിയ ബെന്നി ബെഹനാന്‍ സ്വാമിക്ക് ഫലവര്‍ഗങ്ങള്‍ സമര്‍പ്പിച്ചു. അദ്വൈതാശ്രമം സെക്രട്ടറി സ്വാമി ശിവസ്വരൂപാനന്ദയും മഠാധിപതിക്കൊപ്പം ഉണ്ടായിരുന്നു. നമ്മെ സഹായിക്കുന്നവര്‍ ജയിക്കണം എന്നായിരുന്നു അനുഗ്രഹം തേടിയ സ്ഥാനാര്‍ഥിക്ക് സ്വാമിജി നല്‍കിയ മറുപടി.
മഠത്തിന്റെ എല്ലാ അനുഗ്രഹങ്ങളും ഉണ്ടാകും. ഞങ്ങളെ സഹായിക്കുന്നവരെ തിരിച്ചും സഹായിക്കും സ്വാമി പറഞ്ഞു. സ്ഥാനാര്‍ഥിയെ നെറുകയില്‍ കൈ വച്ച് അനുഗ്രഹിച്ച വിശുദ്ധാനന്ദ സ്വാമി വിജയാശംസകളും നേര്‍ന്നു.  ഭാര്യ ഷേര്‍ളിയോടൊപ്പമാണ് ബെന്നി ബെഹനാന്‍ അദ്വൈതാശ്രമത്തിലെത്തിയത്.  അന്‍വര്‍ സാദത്ത് എം.എല്‍.എ, കെ.പി.സി.സി സെക്രട്ടറിമാരായ ബി.എ അബ്ദുല്‍ മുത്തലിബ്, ടി.എം സക്കീര്‍ ഹുസൈന്‍, യു.ഡി.എഫ് ജില്ലാ ചെയര്‍മാന്‍ എം.ഒ ജോണ്‍ തുടങ്ങിയവരും ബെന്നി ബെഹനാനൊപ്പം ഉണ്ടായിരുന്നു.