തിരുവനന്തപുരം: ലൈഫ് പദ്ധതിയിലെ ഫ്‌ളാറ്റ് നിര്‍മാണത്തിന്റെ ധാരണാപത്രം തയാറാക്കിയത് റെഡ് ക്രസന്റ്. പദ്ധതി ലൈഫ് മിഷനെ ഏല്‍പ്പിച്ചുകൊണ്ടുളള തദ്ദേശഭരണ വകുപ്പിന്റെ കത്തില്‍ ഇക്കാര്യം വ്യക്തമാക്കിയിട്ടുണ്ട്. തദ്ദേശ സ്വയംഭരണ വകുപ്പായിരുന്നു ധാരണാപത്രം തയാറാക്കേണ്ടിയിരുന്നത്.
എന്നാല്‍ ഇതിനു വിരുദ്ധമായാണ് റെഡ് ക്രസന്റാണ് കരാര്‍ തയാറാക്കിയത്. കരട് കരാര്‍ നിയമവകുപ്പ് പരിശോധിച്ച് കൃത്യമായ നടപടിക്രമം പാലിച്ച് നയപരമായ തീരുമാനത്തോടെയാകണം ഒപ്പിടേണ്ടതെന്നും നിര്‍ദേശിച്ചിരുന്നെങ്കിലും വളരെ തിടുക്കത്തിലായിരുന്നു ഒപ്പിടല്‍ നടന്നത്.
ധാരണാപത്രത്തില്‍ ഒപ്പിടുന്നതിന് മുഖ്യമന്ത്രിയുടെ കോണ്‍ഫറന്‍സ് ഹാളില്‍ എത്തണമെന്നു കാണിച്ച് 2019 ജൂലൈ 11നാണ് ലൈഫ് മിഷന്‍ സി.ഇ.ഒ യു.വി ജോസിന് തദ്ദേശ സ്വയംഭരണ വകുപ്പ് അഡീഷണല്‍ ചീഫ് സെക്രട്ടറി കത്ത് നല്‍കുന്നത്.
ധാരണാപത്രം റെഡ് ക്രസന്റ് തയാറാക്കിയിട്ടുണ്ടെന്നും ഈ കത്തില്‍ പറഞ്ഞിട്ടുണ്ട്. ലൈഫ് മിഷന്‍ കാണുന്നതിനു മുന്‍പുതന്നെ ഈ കരാര്‍ നിയമ വകുപ്പിലേക്ക് പോയിരുന്നു.
പത്താം തിയതി നിയമവകുപ്പിലേക്ക് പോയ ധാരണാപത്രമാണ് നിയമ തടസങ്ങളില്ലെന്ന അനുമതി നേടി പതിനൊന്നിന് വൈകിട്ട് ഒപ്പിടുന്നത്. വളരെ വേഗത്തിലുള്ള നടപടികളാണ് ഇക്കാര്യത്തില്‍ നടന്നത്.