കയ്പമംഗലം: അറുക്കാന്‍ കൊണ്ടുവന്ന പോത്തിന്റെ കുത്തേറ്റു രണ്ടുപേര്‍ക്ക് പരുക്ക്. പെരിഞ്ഞനം സ്വദേശികളായ ജോഷി മുളങ്ങില്‍, മീര പൊന്നാഞ്ചേരി എന്നിവര്‍ക്കാണ് പരുക്കേറ്റത്. ചെവിക്ക് പരുക്കേറ്റ ജോഷിയെ തൃശൂര്‍ മെഡിക്കല്‍ കോളജിലും മീരയെ മൂന്നുപീടിക ഗാര്‍ഡിയന്‍ ആശുപത്രിയിലും പ്രവേശിപ്പിച്ചു. ഇന്നലെ പുലര്‍ച്ചെ ആറരയോടെ കുറ്റിലക്കടവില്‍ അറക്കാന്‍ കൊണ്ടുവന്നപ്പോഴാണ് പോത്ത് വിരണ്ടോടിയത്. മുളങ്ങില്‍ ഭഗവതി ക്ഷേത്രത്തിന്റെ മുന്‍വശത്തെ റോഡില്‍ നില്‍ക്കുകയായിരുന്ന ജോഷിയെ ഓടി വന്ന പോത്ത് കുത്തി പരുക്കേല്‍പ്പിക്കുകയായിരുന്നു. വീണ്ടും ഓടിയ പോത്ത് വീട്ടുമുറ്റത്ത് അലക്കി കൊണ്ടിരുന്ന മീരയെയും കുത്തി പരുക്കേല്‍പ്പിച്ചു. മണിക്കൂറുകളോളം ഓടിയ പോത്തിനെ നാട്ടുകാര്‍ ചേര്‍ന്ന് പിടികൂടാന്‍ ശ്രമിച്ചെങ്കിലും സാധിച്ചില്ല. തുടര്‍ന്ന് മതിലകം പൊലിസെത്തി എറണാകുളം റൈഫിള്‍ അസോസിയേഷന്‍ അംഗം പി.സി ബിജുവിനെ വിളിച്ചു വരുത്തി പോത്തിനെ വെടിവെച്ചിടുകയായിരുന്നു.