പുലാപ്പറ്റ: എം.എന്‍.കെ എം.ഗവ.ഹയര്‍ സെക്കന്‍ഡറി സ്‌ക്കൂളിലെ ഹയര്‍ സെക്കന്‍ഡറി വിഭാഗത്തിലെ സൂര്യകാന്തി ഗൈഡ്‌സ് യൂനിറ്റിന് മികച്ച പ്രവര്‍ത്തനത്തിനുള്ള ഈ വര്‍ഷത്തെ സംസ്ഥാന പുരസ്‌ക്കാരം ലഭിച്ചു. ചീഫ് മിനിസ്റ്റേഴ്‌സ് ഷീല്‍ഡ് എന്ന ഈ ബഹുമതി വിദ്യാലയത്തെ തേടി എത്തുന്നത് ഇത് രണ്ടാം തവണയാണ്. രണ്ടു വര്‍ഷം തുടര്‍ച്ചയായി ഈ പുരസ്‌കാരം ലഭിക്കുന്ന സംസ്ഥാനത്തെ ഏക സര്‍ക്കാര്‍ വിദ്യാലയമാണിത്.
ലഹരി വിരുദ്ധ ബോധവത്കരണ പരിപാടികള്‍, പരിസ്ഥിതി സംരക്ഷണ പ്രവര്‍ത്തനങ്ങള്‍, പൊലിസ് ഡിപ്പാര്‍ട്ട്‌മെന്റു മായി സഹകരിച്ച് നടത്തിയ ട്രാഫിക് ബോധവല്‍കരണം ആരോഗ്യ വകുപ്പിന്റെ സഹകരണത്തോടെ സംഘടിപ്പിച്ച മെഡിക്കല്‍ ക്യാംപ്, സാന്ത്വന പരിചരണ പ്രവര്‍ത്തനങ്ങള്‍, ദേശീയോദ്ഗ്രഥനവുമായി ബന്ധപ്പെട്ട് നടത്തിയ വിവിധ ഭാഷാ ചലച്ചിത്ര പ്രദര്‍ശനം, ഭക്ഷ്യമേള, വനംവകുപ്പിന്റെ സഹായത്തോടെ നടത്തിയ അട്ടപ്പാടി ശുചീകരണം, ഹൈക്ക് എന്നിവ ഗൈഡ്‌സ് യൂനിറ്റിന്റെ കഴിഞ്ഞ വര്‍ഷത്തെ പ്രധാന പ്രവര്‍ത്തനങ്ങളാണ്. ഗൈഡ് ക്യാപ്റ്റന്‍ അമ്പിളി ടീച്ചര്‍ പ്രവര്‍ത്തനങ്ങള്‍ക്ക് നേതൃത്വം നല്‍കുന്നു.