കൊച്ചി: 'ഉള്ളില്‍ അലതല്ലും രാഗാ രാഗാ...... നെഞ്ചിടിനാളം രാഗാ രാഗാ..... ഇന്ത്യന്‍ തെളിവാനില്‍ രാഗാ രാഗാ...' രാഹുല്‍ ഗാന്ധിക്കായി ഒരുകൂട്ടം യുവാക്കള്‍ സൗജന്യമായി ഒരുക്കിയ'രാഗാ ഗാനം'സമൂഹമാധ്യമങ്ങളിലും ഓണ്‍ലൈന്‍ ചാനലുകളിലും പേജുകളിലും വൈറലാണ്. രാഹുല്‍ ഗാന്ധിയുടെ പ്രവര്‍ത്തനങ്ങളും പ്രതീക്ഷകളും പങ്കുവയ്ക്കുന്ന ചടുല താളവും വരികളും ആലാപനവുമാണ് ഗാനം ശ്രദ്ധേയമാക്കുന്നത്.

മൂന്നുലക്ഷം പേര്‍ കണ്ട ഗാനം മലയാളത്തിനു പുറമേ ഇംഗ്ലീഷ് സബ് ടൈറ്റിലോടെ ഹിന്ദിയിലുമുണ്ട്. ചലച്ചിത്ര മേഖലയിലെ സുഹൃത്തുക്കള്‍ ചേര്‍ന്ന് സൗജന്യമായാണ് പാട്ട് ചിത്രീകരിച്ചത്.
ആശയവും വരികളും സോജു ജോഷ്വ. ഈണം നല്‍കി പാടിയത് സാമുവല്‍ എബി. വിഡിയോ ആക്കിയത് ജഷിന്‍ അനിമേന്‍. യുവാക്കള്‍ക്ക് പ്രാധാന്യമുള്ള പുതിയ ഇന്ത്യ എന്ന കാഴ്ചപ്പാടില്‍ രാഹുല്‍ ഗാന്ധിക്കുള്ള പിന്തുണയാണ് ഗാനമെന്ന് ഇതിന്റെ അണിയറ പ്രവര്‍ത്തകര്‍ പറഞ്ഞു.