മലപ്പുറം: സി-സോണ്‍, ഇന്റര്‍ സോണ്‍ മത്സരങ്ങളില്‍ മാപ്പിളപ്പാട്ടിലെ ആദ്യചാംപ്യന്റെ പരിശീലനത്തില്‍ മത്സരത്തിനെത്തിയ മമ്പാട് എം.ഇ.എസ് കോളജ് മാപ്പിളപ്പാട്ടെല്ലാം കൊണ്ടുപോയി. വ്യക്തികഗത ഇനങ്ങളായ മാപ്പിളപ്പാട്ട് (ആണ്‍), മാപ്പിളപ്പാട്ട് (പെണ്‍), മാപ്പിളപ്പാട്ട് (ഗ്രൂപ്പ്) ഇനങ്ങളിലാണ് മമ്പാട് എം.ഇ.എസ് കോളജ് ഒന്നാമതെത്തിയത്.
ബി.എ രണ്ടാംവര്‍ഷ വിദ്യാര്‍ഥി മുര്‍ഷിദ് ആണ്‍കുട്ടികളുടെ മാപ്പളപ്പാട്ടില്‍ ഒന്നാമതെത്തിയപ്പോള്‍ ഒന്നാംവര്‍ഷ ചരിത്ര വിദ്യാര്‍ഥി കെ.ടി സുല്‍ഫയാണ് പെണ്‍കുട്ടികളില്‍ ഒന്നാമതെത്തിയത്. ഗ്രൂപ്പ് മത്സരത്തില്‍ ഇരുവര്‍ക്കും പുറമേ അജ്മല്‍, രാജശ്രീ, ബിന്‍ഷാന, ഷിബിലി എന്നിവരാണ് പങ്കെടുത്തത്. കോളജിലെ പൂര്‍വവിദ്യാര്‍ഥിയും മാപ്പിളപ്പാട്ടില്‍ സി-സോണ്‍, ഇന്റര്‍ സോണ്‍ മത്സരങ്ങളിലെ പ്രഥമ ചാംപ്യനുമായ സാദിഖ് പന്തല്ലൂരാണ് മൂന്നു ടീമുകളെയും മാപ്പിളപ്പാട്ട് പരിശീലിപ്പിച്ചത്.
ഒ.എം കരുവാരക്കുണ്ട് രചനയും സാദിഖ് പന്തല്ലൂര്‍ സംഗീതവും നിര്‍വഹിച്ച ഇന്ത്യന്‍ സൈനികരെ കുറിച്ചുള്ള ഗാനമാണ് മുര്‍ഷിദ് പാടിയത്. ബദറുദ്ദീന്‍ പാറന്നൂരിന്റെ രചനയില്‍ മുഹ്‌സിന്‍ കുരിക്കള്‍ സംഗീതം ചെയ്ത ഗാനമാലപിച്ചാണ് സുല്‍ഫയ്ക്ക് ഒന്നാംസ്ഥാനം ലഭിച്ചത്.