മലപ്പുറം: സി-സോണ്‍ കലോത്സവത്തിന് ഇന്നു സമാപനം. മലപ്പുറം ഗവ. കോളജിലെ നാലു വേദികളിലായാണ് മത്സരം നടക്കുന്നത്.
നാടോടിനൃത്തത്തിന്റെ ഗ്രൂപ്പ്, വ്യക്തിഗത ഇനങ്ങള്‍ അരങ്ങേറിയ വേദി ഒന്നിനെ നിറഞ്ഞ കൈടിയോടെയാണ് വിദ്യാര്‍ഥികള്‍ എതിരേറ്റത്. വേദി രണ്ടില്‍ ലളിതഗാനം, സെമിക്ലാസിക്കല്‍ സംഗീതം, സംഘഗാനം, നാടോടി സംഗീതം എന്നിവ അരങ്ങേറിയപ്പോള്‍ ജനപ്രിയ ഇനങ്ങളായ മലയാള നാടകം, മോണോആക്ട്, കാഥാപ്രസംഗം എന്നീ മത്സരങ്ങളാണ് വേദി മൂന്നില്‍ അരങ്ങേറിയത്. വേദി നാലില്‍ കവിതാ പാരായണ മത്സരമാണ് നടന്നത്.
ഇന്നലത്തെ അവസാന ഫലം പുറത്തുവന്നപ്പോള്‍ 131 പോയിന്റ് നേടി മമ്പാട് എം.ഇ.എസ് കോളജാണ് ഒന്നാംസ്ഥാനത്ത്. 43 ഇനങ്ങളിലായി നടന്ന ഓഫ് സ്റ്റേജ് മത്സരങ്ങളില്‍ 70 പോയിന്റ് നേടി തിരൂരങ്ങാടി പി.എസ്.എം.ഒ കോളജ്, കാലിക്കറ്റ് യൂനിവേഴ്‌സിറ്റി കാംപസ് എന്നിവര്‍ ഒന്നാമതെത്തി. 45 പോയിന്റ് നേടിയ മമ്പാട് കോളജ് രണ്ടാമതും 33 പോയിന്റോടെ കാലിക്കറ്റ് യൂനിവേഴ്‌സിറ്റി ടീച്ചേഴ്‌സ് എജ്യൂക്കേഷന്‍ സെന്റര്‍ മൂന്നാമതുമാണ്. 30 പോയിന്റ് നേടിയ മലപ്പുറം ഗവ. കോളജാണ് നാലാമത്. സ്റ്റേജ് മത്സരങ്ങള്‍ ആദ്യദിനത്തില്‍ രാത്രി ഒന്നരയോടെയാണ് സമാപിച്ചത്. ഇന്നലെ രാത്രി വൈകിയും പരിപാടികള്‍ തുടരുകയാണ്. കല സംരക്ഷിക്കപ്പെടേണ്ടത് പുതിയ കാലത്തിന്റെ അനിവാര്യതയാണെന്നും രാജ്യത്തു നിലനില്‍ക്കുന്ന ഭിന്നകലാരൂപങ്ങള്‍ ഇന്ത്യന്‍ സംസ്‌കാരത്തെയാണ് പ്രതിനിധീകരിക്കുന്നതെന്നും കലോത്സവം ഉദ്ഘാടനം ചെയ്ത നിയുക്ത എം.പി പി.കെ കുഞ്ഞാലിക്കുട്ടി പറഞ്ഞു. പി. ഉബൈദുല്ല എം.എല്‍.എ അധ്യക്ഷനായി. ജില്ലാപഞ്ചായത്ത് പ്രസിഡന്റ് എ.പി ഉണ്ണികൃഷ്ണന്‍, വൈസ് പ്രസിഡന്റ് സക്കീന പുല്‍പ്പാടന്‍, സി.എച്ച് ജമീല, കെ.എന്‍.എ ഖാദര്‍, യൂസുഫ് വല്ലാഞ്ചിറ, രാജന്‍ നമ്പ്യാര്‍, സൈനുല്‍ ആബിദ് കോട്ട, ഗീത നമ്പ്യാര്‍, ടി.പി ഹാരിസ്, വി.പി അഹമ്മദ് സഹീര്‍, നിശാജ് എടപ്പറ്റ, നിശാദ് ക സലീം, ശരത് പ്രസാദ്, പി. സജിത, കെ.എം ഇസ്മാഈല്‍, ഇബ്രാഹീം ബാദുഷ, ഫസീല സംസാരിച്ചു.