പിണങ്ങോട്: ജില്ലയിലെ ഹയര്‍ സെക്കന്‍ഡറി, കോളജ് തലങ്ങളിലെ പ്രതിഭകളെ പങ്കെടുപ്പിച്ച് എം.എസ്.എഫ് ജില്ലാ കമ്മിറ്റി സംഘടിപ്പിച്ച മാറ്റ് കലോത്സവം സമാപിച്ചു.
 ഏപ്രില്‍ 28, 29 ദിവസങ്ങളിലായി പിണങ്ങോട് ഓര്‍ഫനേജ് ഹയര്‍ സെക്കന്‍ഡറി സ്‌കൂളിലാണ് കലോത്സവം നടന്നത്.
 ജില്ലയിലെ ഹൈസ്‌കൂള്‍, ഹയര്‍ സെക്കന്‍ഡറി, കോളജ് തലത്തില്‍ പഠിക്കുന്ന വിദ്യാര്‍ഥികളാണ് 34 ഇനങ്ങളിലായി നടന്ന മാറ്റ് കലോത്സവത്തില്‍ മാറ്റുരച്ചത്. കലയിലെ സത്യവും നീതിയും നഷ്ടപ്പെടുന്ന കാലത്ത്, രക്ഷിതാക്കളുടെ വാശിയും കേവലം ഗ്രേഡ് താത്പര്യങ്ങളും മാത്രം കലാ മത്സരത്തിനാധാരമാവുന്ന സന്ദര്‍ഭത്തില്‍ മൂല്യബോധമുള്ള കലാകാരന്മാരെയും നീതിയുടെ പക്ഷത്ത് നില്‍ക്കുന്ന പുതുതലമുറയെയും തിരികെ കൊണ്ട് വരികയെന്ന ലക്ഷ്യവുമായാണ് എം.എസ്.എഫ് മാറ്റ് കലോത്സവം സംഘടിപ്പിച്ചത്.
 കലോത്സവത്തില്‍ വെങ്ങപ്പള്ളി പഞ്ചായത്ത് ചാംപ്യന്‍മാരായി. സമാപന സാംസ്‌കാരിക സദസ് മുസ്്‌ലിം ലീഗ് ജില്ലാ പ്രസിഡന്റ് പി.പി.എ കരീം ഉദ്ഘാടനം ചെയ്തു. എം.എസ്.എഫ് ജില്ലാ പ്രസിഡന്റ് വി.പി സി ലുഖ്മാനുല്‍ ഹക്കീം അധ്യക്ഷത വഹിച്ചു. കാലിക്കറ്റ് യൂനിവേഴ്‌സിറ്റിയില്‍ നിന്നും പി.എച്ച്.ഡി നേടിയ ഡോ: പി.നജ്മുദ്ദീന്‍, ഡോ: ബാവ കെ. പാലുകുന്ന് മുഖ്യാതിഥികളായി.
എം.എസ്.എഫ് സംസ്ഥാന ജനറല്‍ സെക്രട്ടറി എം.പി നവാസ്, മുസ്‌ലിം ലീഗ് മണ്ഡലം പ്രസിഡണ്ട് റസാഖ് കല്‍പ്പറ്റ, യൂത്ത് ലീഗ് ജില്ലാ പ്രസിഡണ്ട് കെ.ഹാരിസ്, എം.എസ്.എഫ് ദേശീയ നിര്‍വാഹക സമിതിയംഗം സി.എച്ച് ഫസല്‍, ബ്ലോക്ക് പഞ്ചായത്ത് വൈസ് പ്രസിഡണ്ട് കെ.കെ ഹനീഫ സംസാരിച്ചു.