ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ മാഞ്ചസ്റ്റര്‍ യുനൈറ്റഡിന് നാണംകെട്ട തോല്‍വി. ഇന്നലെ നടന്ന മത്സരത്തില്‍ എവര്‍ട്ടനോട് എതിരില്ലാത്ത നാലു ഗോളുകള്‍ക്കാണ് യുനൈറ്റഡ് പരാജയപ്പെട്ടത്. ചാംപ്യന്‍സ് ലീഗില്‍ ബാഴ്‌സലോണയോട് തോറ്റ ക്ഷീണം തീര്‍ക്കാന്‍ എത്തിയ മാഞ്ചസ്റ്റര്‍ യുനൈറ്റഡിന് ബാഴ്‌സലോണ നല്‍കിയതിനേക്കാള്‍ വലിയ തോല്‍വി ആണ് എവര്‍ട്ടന്‍ കൊടുത്തത്. ഇന്നലത്തെ മത്സരത്തില്‍ യുനൈറ്റഡിന് പൂജ്യം മാര്‍ക്ക് മാത്രമേ നല്‍കാനാകൂ. തോല്‍വിയോടെ ആദ്യ നാലില്‍ കയറിപ്പറ്റി ചാപ്യന്‍സ് ലീഗ് യോഗ്യത നേടുകയെന്ന യുനൈറ്റഡിന്റെ മോഹം തുലാസിലായി.

കളിയുടെ തുടക്കത്തില്‍ റിച്ചാര്‍ലിസന്റെ ഷോട്ട് യുനൈറ്റഡ് ഗോള്‍ കീപ്പര്‍ ഡിഗിയ സേവ് ചെയ്‌തെങ്കിലും കളി ഗോള്‍രഹിതമായി അധിക സമയം നിന്നില്ല. 13ാം മിനുട്ടില്‍ ഓവര്‍ഹെഡ് കിക്കിലൂടെ ആദ്യം എവര്‍ട്ടന്‍ വലകുലുക്കി. 28-ാം മിനുട്ടില്‍ സിഗുര്‍സണിലൂടെ എവര്‍ട്ടനിന്റെ രണ്ടാം ഗോളും വന്നു. ഇതോടെ യുനൈറ്റഡ് പൂര്‍ണമായും പ്രതിരോധത്തിലായി. പിന്നീട് യുനൈറ്റഡിന് തൊട്ടതെല്ലാം പിഴച്ചു. മികച്ചൊരു നീക്കം പോലും നടത്താനാവാതെ യുനൈറ്റഡ് നിര കുഴങ്ങി. 56-ാം മിനുട്ടില്‍ ഡിഗ്‌നെയും 64-ാം മിനുട്ടില്‍ വാല്‍കോട്ടും ഗോള്‍ നേടി മത്സരം 4-0 എന്ന സ്‌കോറില്‍ എത്തിച്ചു. മാഞ്ചസ്റ്റര്‍ യുനൈറ്റഡിനെതിരേ എവര്‍ട്ടന്‍ നേടുന്ന ചരിത്രത്തിലെ ഏറ്റവും വലിയ വിജയം കൂടിയായിരുന്നു ഇന്നലത്തേത്. മാഞ്ചസ്റ്റര്‍ യുണൈറ്റഡിന്റെ അവസാന എട്ടു മത്സരങ്ങള്‍ക്കിടയിലെ ആറാം തോല്‍വി കൂടിയാണിത്. ഇനി മാഞ്ചസ്റ്റര്‍ സിറ്റി, ചെല്‍സി എന്നിവര്‍ക്കെതിരേയാണ് മാഞ്ചസ്റ്റര്‍ യുനൈറ്റഡിന്റെ അടുത്ത ലീഗ് മത്സരങ്ങള്‍. ഇതിലും തകര്‍ന്നാല്‍ പട്ടികയില്‍ നിന്ന് യുനൈറ്റഡിന് ഇനിയും താഴേക്ക് ഇറങ്ങേണ്ടി വരും.
മറ്റൊരു മത്സരത്തില്‍ എതിരില്ലാത്ത രണ്ട് ഗോളുകള്‍ക്ക് കാര്‍ഡിഫ് സിറ്റിയെ പരാജയപ്പെടുത്തി ലിവര്‍പൂള്‍ വീണ്ടും പട്ടികയില്‍ ഒന്നാമതെത്തി. ഇരുടീമുകളും മികച്ച പ്രകടനം പുറത്തെടുത്ത മത്സരത്തിന്റെ ആദ്യ പകുതി ഗോള്‍ രഹിതമായിരുന്നു. രണ്ടാം പകുതിക്ക് ശേഷം 57-ാം മിനുട്ടില്‍ വ്യന്‍ഡുലവും 81-ാം മിനുട്ടില്‍ ജെയിംസ് മില്‍നറുമാണ് ലിവര്‍പൂളിനായി ഗോളുകള്‍ നേടിയത്. മറ്റൊരു മത്സരത്തില്‍ 3-2 എന്ന സ്‌കോറിന് ആഴ്‌സനല്‍ ക്രിസ്റ്റല്‍ പാലസിനോട് പരാജയപ്പെട്ടു. 47-ാം മിനുട്ടില്‍ മെസുട്ട് ഓസിലും 77-ാം മിനുട്ടില്‍ ഒബമയോങ്ങുമാണ് ആഴ്‌സനലിന് വേണ്ടി ഗോളുകള്‍ നേടിയത്. ക്രിസറ്റിയന്‍ ബെന്റക്കെ (17), വില്‍ഫ്രഡ് സാഹ (61), ജെയിംസ് മക്ആര്‍തര്‍ (69) എന്നിവരാണ് ക്രിസ്റ്റല്‍ പാലസിന്റെ ഗോള്‍ സ്‌കോറര്‍മാര്‍.