കൊല്‍ക്കത്ത: ഐ.പി.എല്ലില്‍ കൊല്‍ക്കത്ത നൈറ്റ് റൈഡേഴ്‌സിനെ പരാജയപ്പെടുത്തി സണ്‍റൈസേഴ്‌സ് ഹൈദരാബാദ്. ഒന്‍പത് വിക്കറ്റിനാണ് ഹൈദരാബാദ് കൊല്‍ക്കത്തയെ തകര്‍ത്തെറിഞ്ഞത്. ജയത്തോടെ ഹൈദരാബാദ് പട്ടികയില്‍ നാലാം സ്ഥാനത്തെത്തി. ഒന്‍പത് മത്സരങ്ങളില്‍ 10 പോയിന്റാണ് ഹൈദരാബാദിനുള്ളത്.
ഐ.പി.എല്‍ 12ാം സീസണില്‍ മികച്ച തുടക്കത്തിന് ശേഷമാണ് കൊല്‍ക്കത്തയുടെ തുടര്‍പതനം. സീസണിലെ ആദ്യ അഞ്ച് മത്സരങ്ങളില്‍ നാലും വിജയിച്ച് എട്ട് പോയിന്റ് നേടിയ കൊല്‍ക്കത്ത പിന്നീട് നടന്ന അഞ്ച് മത്സരങ്ങളിലും പരാജയപ്പെട്ട് നിലവില്‍ ആറാം സ്ഥാനത്താണ്.

ഇന്നലെ നടന്ന മത്സരത്തില്‍ ആദ്യം ബാറ്റ് ചെയ്ത കൊല്‍ക്കത്ത നിശ്ചിത 20 ഓവറില്‍ എട്ട് വിക്കറ്റ് നഷ്ടത്തില്‍ 159 റണ്‍സെടുത്തപ്പോള്‍ ഹൈദരാബാദ് 30 പന്തുകള്‍ ശേഷിക്കെ ലക്ഷ്യത്തിലെത്തി. ഓപ്പണിങ് കൂട്ടുകെട്ടില്‍ വാര്‍ണര്‍- ബൈര്‍‌സ്റ്റോ സഖ്യം നേടിയ 131 റണ്‍സാണ് ഹൈദരാബാദിന്റെ വിജയം അനായാസമാക്കിയത്. വാര്‍ണര്‍ 38 പന്തില്‍ 67 റണ്‍സെടുത്തു. ബൈര്‍‌സ്റ്റോ 43 പന്തില്‍ 80 റണ്‍സെടുത്ത് പുറത്താകാതെ നിന്നു. ഈ സീസണില്‍ നാലുതവണയാണ് ഹൈദരാബാദിന്റെ ഓപ്പണിങ് സഖ്യം 100 റണ്‍സ് കടന്നത്. മൂന്നുതവണ ബൈര്‍‌സ്റ്റോവിന് ജീവന്‍ നല്‍കിയത് കൊല്‍ക്കത്തയ്ക്ക് വിനയായി. കൊല്‍ക്കത്തയ്ക്കായി ഇറങ്ങിയ കെസി കരിയപ്പയ്ക്കും പൃഥ്വിരാജിനും തിളങ്ങാനായില്ല. പൃഥിരാജ് മൂന്ന് ഓവറില്‍ 29 റണ്‍സും കരിയപ്പ രണ്ട് ഓവറില്‍ 34 റണ്‍സും വിട്ടുകൊടുത്തു.

വിജയം പ്രതീക്ഷിച്ച് ആദ്യം ബാറ്റ് ചെയ്ത കൊല്‍ക്കത്തക്ക് സുനില്‍ നരൈനും ക്രിസ് ലിന്നും മിന്നുംതുടക്കം സമ്മാനിച്ചെങ്കിലും വലിയ സ്‌കോറാക്കി മാറ്റാന്‍ കൊല്‍ക്കത്തയ്ക്ക് കഴിഞ്ഞില്ല. ഇരുവരും 2.3 ഓവറില്‍ 42 റണ്‍സാണ് അടിച്ചെടുത്തത്. ഈ ഓവറിലെ നാലാം പന്തില്‍ ഖലീല്‍ അഹമ്മദിന് വിക്കറ്റ് സമ്മാനിച്ച് നരൈന്‍ (25) പുറത്തായതോടെ കൊല്‍ക്കത്തയുടെ പതനം ആരംഭിച്ചു.

കൊല്‍ക്കത്തയ്ക്കായി ക്രിസ് ലിന്‍ (51), റിങ്കു സിങ് (30) എന്നിവര്‍ മാത്രമാണ് ബാറ്റിങ്ങില്‍ തിളങ്ങിയത്. സൂപ്പര്‍ താരം ആന്ദ്രേ റസ്സലിന് പ്രതീക്ഷിച്ച പ്രകടനം നടത്താനായില്ല. ഭുവനേശ്വര്‍ കുമാറിന്റെ ഓവറില്‍ രണ്ട് സിക്‌സറടിച്ച റസ്സല്‍ അതേ ഓവറില്‍ തന്നെ ക്യാച്ച് നല്‍കി മടങ്ങുകയായിരുന്നു. ഒന്‍പത് പന്തില്‍ 15 റണ്‍സാണ് താരം നേടിയത്. നിഥീഷ് റാണ (11), ദിനേഷ് കാര്‍ത്തിക് (6) എന്നിവരാണ് മറ്റു സ്‌കോറര്‍മാര്‍. റസ്സല്‍ പുറത്തായതോടെ അവസാന ഓവറില്‍ കൂടുതല്‍ റണ്‍സ് നേടാമെന്ന കൊല്‍ക്കത്തയുടെ പ്രതീക്ഷയും അസ്ഥാനത്തായി. ഹൈദരാബാദിന് വേണ്ടി ഖലീല്‍ അഹമ്മദ് മൂന്നും ഭുവനേശ്വര്‍ കുമാര്‍ രണ്ടും വിക്കറ്റ് വീഴ്ത്തി.