ചെന്നൈ: ചിത്രാപൗര്‍ണമിയോടനുബന്ധിച്ച് തമിഴ്‌നാട്ടിലെ ട്രിച്ചി ജില്ലയിലെ ഒരു ക്ഷേത്രത്തില്‍ തിക്കിലും തിരക്കിലുംപെട്ട് നാല് സ്ത്രീകള്‍ ഉള്‍പ്പെടെ ഏഴുപേര്‍ മരിച്ചു.
ട്രിച്ചി ജില്ലയിലെ തുറൈയൂര്‍ താലൂക്കിലെ മുതയംപാളയം ഗ്രാമത്തിലെ കറുപ്പസ്വാമി ക്ഷേത്രത്തിലെ ചിത്രാ പൗര്‍ണമിയോടനുബന്ധിച്ച് നടന്ന ചടങ്ങാണ് അപകടത്തില്‍ കലാശിച്ചത്.

ഭക്തര്‍ക്ക് ക്ഷേത്ര പൂജാരി 'പിടിക്കാശ് ' (ക്ഷേത്രത്തിലെ പ്രതിഷ്ഠക്ക് മുന്‍പില്‍ നിന്ന് ഭക്തര്‍ക്ക് പണം നല്‍കുന്ന ചടങ്ങ്) നല്‍കുമ്പോള്‍ ഇത് വാങ്ങിക്കാനുള്ള തിക്കിലും തിരക്കിലുമാണ് ഏഴുപേര്‍ മരിച്ചത്. പ്രതിഷ്ഠക്കുമുന്‍പില്‍ വച്ച് നല്‍കുന്നതായതുകൊണ്ട് ഇത് വിശുദ്ധമാണെന്ന വിശ്വാസത്തില്‍ പണം കൈപ്പറ്റാന്‍ ആയിരങ്ങളാണ് ചിത്രാപൗര്‍ണമി ദിവസം ക്ഷേത്രത്തില്‍ എത്താറുള്ളത്.
ഇന്നലെ രാവിലെ 11 നായിരുന്നു അപകടം. 2004 മുതലാണ് ക്ഷേത്രത്തില്‍ പിടിക്കാശ് നല്‍കുന്ന ചടങ്ങ് തുടങ്ങിയത്. ഇതാദ്യമായാണ് ഇത്തരമൊരു സംഭവമെന്ന് ക്ഷേത്രം ഭാരവാഹികള്‍ പറഞ്ഞു.
തെരഞ്ഞെടുപ്പ് കഴിഞ്ഞ് വോട്ടിങ് മെഷിനുകള്‍ സൂക്ഷിച്ച ഇടങ്ങളിലേക്ക് സുരക്ഷക്കായി പൊലിസിനെ നിയോഗിച്ചതുകാരണം ക്ഷേത്രത്തില്‍ ജനത്തിരക്ക് നിയന്ത്രിക്കാന്‍ ആവശ്യത്തിന് പൊലിസ് ഉണ്ടായിരുന്നില്ല.
അപകടവിവരമറിഞ്ഞ് ട്രിച്ചി പൊലിസ് സൂപ്രണ്ട് സിയാഉല്‍ ഹഖ് സ്ഥലത്തെത്തി. പിടിക്കാശ് നല്‍കുന്ന ചടങ്ങ് അവസാനിക്കാന്‍ പോകുന്നുവെന്ന വാര്‍ത്തയെ തുടര്‍ന്ന് ആയിരങ്ങള്‍ തിക്കിത്തിരക്കി എത്തിയതാണ് അപകടത്തിന് കാരണമായതെന്ന് പൊലിസ് സൂപ്രണ്ട് പറഞ്ഞു.