സ്‌കൂളുകളില്‍ പഠനത്തിനാവശ്യമായ എല്ലാ സൗകര്യങ്ങളും ഒരുക്കിയ ശേഷമായിരുന്നു കുട്ടികളെ മന്ത്രി ക്ഷണിച്ചത്
പുതുക്കാട്: എല്‍.ഡി.എഫ് സര്‍ക്കാര്‍ നടപ്പിലാക്കുന്ന പൊതു വിദ്യാഭ്യാസ സംരക്ഷണത്തിന്റെ ഭാഗമായുള്ള ഗൃഹ സന്ദര്‍ശന പരിപാടിയുടെ സംസ്ഥാന തല ഉദ്ഘാടനം പുതുക്കാട് മണ്ഡലത്തിലെ ചാക്കോച്ചിറയില്‍ നടന്നു.
ജില്ലാ പഞ്ചായത്ത് സ്ഥിരം സമിതി അധ്യക്ഷന്‍ കെ.ജെ ഡിക്‌സണ്‍, പുതുക്കാട് പഞ്ചായത്ത് പ്രസിഡന്റ് അമ്പിളി ശിവരാജന്‍, ഷാജു കാളിയങ്കര, സതി സുധീര്‍, കൊടകര ബി.പി.ഒ കെ.നന്ദകുമാര്‍ എന്നിവരോടൊപ്പം വിദ്യാഭ്യാസ മന്ത്രി ഗൃഹ സന്ദര്‍ശനത്തിന് നേതൃത്വം നല്‍കി. പുതുക്കാടുള്ള സര്‍ക്കാര്‍ സ്‌കൂളിലേക്കാണ് മന്ത്രി ഗൃഹങ്ങള്‍ സന്ദര്‍ശിച്ചു വിദ്യാര്‍ഥികളെ ക്ഷണിച്ചത്.
സ്‌കൂളുകളില്‍ പഠനത്തിനാവശ്യമായ എല്ലാ സൗകര്യങ്ങളും ഒരുക്കിയ ശേഷമായിരുന്നു കുട്ടികളെ മന്ത്രി ക്ഷണിച്ചത്. ജൂണ്‍ മാസം ഒന്നിന് സ്‌കൂള്‍ തുറക്കുന്നതിനു മുമ്പ് തന്നെ വിദ്യാലയങ്ങളില്‍ പുസ്തകങ്ങള്‍ എത്തുമെന്ന് മന്ത്രി പറഞ്ഞു.  യൂണിഫോമുകളും എത്തിക്കും. പൊതു വിദ്യാഭ്യാസം സംരക്ഷിക്കേണ്ട ആവശ്യകതയും പ്രാധാന്യവും ഉള്‍ക്കൊള്ളുന്ന ലഘു ലേഖകളും മന്ത്രി വിതരണം ചെയ്തു. കൂടാതെ എല്ലാ സ്‌കൂളുകളും അന്താരാഷ്ട്ര നിലവാരത്തിലേക്ക് ഹൈടെക് സംവിധാനനങ്ങളോടെ ഉയര്‍ത്താനുള്ള കര്‍മ്മ പരിപാടികളും മന്ത്രി വീടുകളില്‍ വിശദീകരിച്ചു.