കിഴിശ്ശേരി: കുടിവെള്ള പൈപ്പ്‌പൊട്ടി മണിക്കൂറുകളോളം വെള്ളം പാഴായി.  മുണ്ടംപറമ്പ്  പള്ളിപ്പടിയിലാണ് ചീക്കോട് കുടിവെള്ള പദ്ധതിയുടെ പൈപ്പ് ലൈന്‍ പൊട്ടി മണിക്കൂറുകളോളം വെള്ളം റോഡിലൂടെ ഒഴുകിയത്.  ഇന്നലെ രാവിലെ 12ഓടെയാണ് സംഭവം. നാട്ടുകാര്‍ അറിയിച്ചതിനെ തുടര്‍ന്ന്  പ്രധാന വാല്‍വ് അടക്കുകയായിരുന്നു.  കുടിവെള്ള പൈപ്പ് പൊട്ടി വെള്ളം പാഴാകുന്നത് ഈ ഭാഗങ്ങളില്‍  പതിവായിരിക്കുകയാണ്.
വേനല്‍ കടുത്തതോടെ തുള്ളിവെള്ളംപോലും കുടിക്കാനില്ലാതെ  നുറുകണക്കിന് കുടുംബങ്ങള്‍ ദുരിതത്തിലായിരിക്കുമ്പോഴാണ് അധികൃതരുടെ അനാസ്ഥ കാരണം ഇത്തരത്തില്‍ കുടിവെള്ളം പാഴാവുന്നത്. മുതുവല്ലൂര്‍ പഞ്ചായത്തിലെ തവനൂര്‍, മുണ്ടിലാക്കല്‍, സ്റ്റേഡിയം ബസാര്‍, ഹാജിയാര്‍ പടി എന്നിവിടങ്ങളില്‍ പൈപ്പ് പൊട്ടിയും കൊണ്ടോട്ടി നഗരസഭയിലെ കാളോത്ത് ഒന്നാംമൈലിലുള്ള ടാങ്കില്‍ നിന്നും വെള്ളം നിറഞ്ഞൊഴുകിയും പാഴായി പോവുന്നത് പതിവ് കാഴ്ചയാണ്.