മൂവാറ്റുപുഴ: വേനല്‍ മഴയ്‌ക്കൊപ്പം ആഞ്ഞ് വീശിയ കാറ്റില്‍ മാറാടി പഞ്ചായത്തില്‍ വ്യാപക നാശനഷ്ടം. സൗത്ത് മാറാടി, കായനാട്, കൊള്ളിക്കാട്ട്‌ശ്ശേരി, മറ്റപ്പാടം പ്രദേശങ്ങളിലാണ് കാറ്റ് നാഷം വിതച്ചത്. സൗത്ത് മാറാടി വേലംമാവുകുടിയില്‍ ഏലിയാസിന്റെ വീട്ടിലേക്ക് പ്ലാവ് മരം മറിഞ്ഞ് വീണ് വീട് ഭാഗീകമായി തകര്‍ന്നു. കായനാട് കൊള്ളിക്കാട്ട്‌ശ്ശേരി ഭാഗത്ത് മരം വീണ് ഇലക്ട്രിക് ലൈനുകള്‍ പൊട്ടി വീണു. കായനാട് ഭാഗങ്ങളിലാണ് വ്യാപകമായി മരം മറിഞ്ഞ് വീണ് ഇലക്ട്രിക് ലൈനുകള്‍ പൊട്ടി വീഴുകയും പോസ്റ്റുകള്‍ ഒടിയുകയും ചെയ്തു. ഇതോടെ പ്രദേശത്ത് വൈദ്യുതി ബന്ധം തകരാറിലായി. റോഡുകളിലേയ്ക്ക് മരം ഒടിഞ്ഞ് വീണ് ഗതാഗതവും തടസപ്പെട്ടു. ഫയര്‍ഫോഴ്‌സും നാട്ടുകാരും ചേര്‍ന്ന് മരങ്ങള്‍ മുറിച്ച് മാറ്റിയാണ് ഗതാഗതം പുനസ്ഥാപിച്ചത്. പ്രദേശത്ത് പുരയിടങ്ങളിലെ റബ്ബര്‍, തേക്ക്, തെങ്ങ്, മരുത്, തുടങ്ങിയ മരങ്ങള്‍ കടപുഴകി വീണു. പ്രദേശത്ത് വ്യാപകമായ കൃഷി നാശവും സംഭവിച്ചു. വാഴ, ജാതി, പച്ചക്കറി കൃഷി അടക്കമുള്ളവ നശിച്ചു.