ഹരിപ്പാട്: സുരക്ഷാവേലിയില്ലാതെ സ്ഥാപിച്ചിരിക്കുന്ന ട്രാന്‍സ്‌ഫോര്‍മറുകള്‍ അപകട ഭീഷണി ഉയര്‍ത്തുന്നു. മുതുകുളം കാര്‍ത്തികപ്പള്ളി റോഡില്‍ സ്റ്റാര്‍ ജങ്ഷനും പാണ്ഡവര്‍കാവ് ജങ്ഷനും വടക്കുമുള്ള ട്രാന്‍സ്‌ഫോര്‍മറുകളാണു ജനജീവിതത്തിന് ഭീഷണിയാകുന്നത്.
മൂന്നിലധികം വിദ്യാലയങ്ങളും മറ്റ് വിദ്യാഭ്യാസ വ്യാപാര സ്ഥാപനങ്ങളും മുതുകുളം ബ്ലോക്ക് ഓഫീസും സ്ഥിതി ചെയ്യുന്ന തിരക്കുള്ള റോഡിന്റെ വശത്താണ് ട്രാന്‍സ്‌ഫോര്‍മറുകള്‍ സ്ഥാപിച്ചിരിക്കുന്നത്. കുട്ടികളുടെ കയ്യെത്തും ദൂരത്തായതിനാല്‍ ഏത് നിമിഷവും ദുരന്തം ഉണ്ടാകാം.
കെ.എസ്.ആര്‍.ടി.സി സ്വകാര്യ ബസുകള്‍ ഉള്‍പ്പെടെ നിരവധി വാഹനങ്ങള്‍ കടന്നുപോകുന്നതും ഇവയ്ക്ക് സമീപത്തുകൂടിയാണ്. റോഡിന് വീതിക്കുറവായതിനാല്‍ വാഹനങ്ങള്‍ക്ക് സൈഡ് കൊടുക്കുമ്പോള്‍ അപകടത്തിന് സാദ്ധ്യതയുണ്ട്.
ഹൈസ്‌കൂള്‍ ജങ്ഷനിലും സ്റ്റാര്‍ ജങ്ഷനിലും വൈദ്യുതി വിതരണം സുഗമമാക്കാനാണ് ട്രാന്‍സ്‌ഫോര്‍മറുകള്‍ സ്ഥാപിച്ചത്. സുരക്ഷാ മുന്‍കരുതല്‍ സ്വീകരിക്കാത്തതിനാല്‍ ഇന്ന് ഇവ ഭീഷണിയായിരിക്കുകയാണ്. രാത്രികാലങ്ങളില്‍ പ്രദേശത്ത് തമ്പടിക്കുന്ന സാമൂഹ്യവിരുദ്ധര്‍ ഫ്യൂസ് ഊരിക്കൊണ്ടുപോയി മറ്റ് സ്ഥലങ്ങളില്‍ ഉപേക്ഷിക്കുന്നതും പതിവായിട്ടുണ്ട്. അടിയന്തര പരിഹാരം കാണണമെന്നാണ് നാട്ടുകാരുടെ ആവശ്യം.