തൊടുപുഴ: തകര്‍ന്ന റോഡ് നന്നാക്കണമെന്ന് ആവശ്യപ്പെട്ട് പ്രദേശവാസികളായ കുട്ടികളുടെ നേതൃത്വത്തില്‍ തൊടുപുഴ മുനിസിപ്പല്‍ ഓഫീസിന് മുന്നില്‍ കുത്തിയിരുപ്പ് സമരം.
നഗരസഭയുടെ 27, 28 വാര്‍ഡുകളിലായി കിടക്കുന്ന കോതായിക്കുന്ന്-മാരിയില്‍ കലുങ്ക് റോഡിലെ തകര്‍ന്ന മുന്നൂറ് മീറ്ററോളം ഭാഗം അറ്റകുറ്റപ്പണി നടത്തണമെന്ന് ആവശ്യപ്പെട്ടായിരുന്നു കുട്ടികളുടെ വേറിട്ട സമരം.
കഴിഞ്ഞ സാമ്പത്തിക വര്‍ഷം റോഡ് ഗതാഗതയോഗ്യമാക്കാമെന്ന് മുനിസിപ്പല്‍ അധികൃതര്‍ ഉറപ്പു നല്‍കിയിരുന്നുവത്രെ. ഇത് പാലിക്കാതെ വന്നപ്പോഴാണ് സ്ഥലവാസികള്‍ കുട്ടികളെ മുന്നില്‍ നിര്‍ത്തി വേറിട്ട സമരം സംഘടിപ്പിച്ചത്. ഉശിരന്‍ മുദ്രാവാക്യവുമായി മുനിസിപ്പല്‍ ഓഫീസിനെ പ്രകമ്പനം കൊള്ളിച്ചായിരുന്നു കുട്ടികളുടെ സമരം.
ഈ റോഡ് പൊതുമരാമത്ത് വകുപ്പിന്റെ അധീനതയിലുള്ളതാണെന്നായിരുന്നു നഗരസഭയുടെ വാദം. എന്നാല്‍, റോഡ് മുനിസിപ്പാലിറ്റിയുടേതാണെന്ന് അന്വേഷണത്തില്‍ ബോധ്യപ്പെട്ടതായി പ്രദേശവാസികള്‍ പറഞ്ഞു.
തുടര്‍ന്ന് വൈസ് ചെയര്‍മാന്‍ ടി .കെ. സുധാകരന്‍ നായരുടെ നേതൃത്വത്തില്‍ മുനിസിപ്പല്‍ അധികൃതര്‍ റോഡ് സന്ദര്‍ശിച്ചു. ഉടന്‍ ഫണ്ട് ലഭ്യമാക്കി റോഡ് ഗതാഗതയോഗ്യമാക്കാമെന്ന് കുട്ടികള്‍ക്ക് ഉറപ്പും നല്‍കി.