കിളിമാനൂര്‍: പത്താം ക്ലാസ് വിദ്യാര്‍ഥിനിയെ വീടിനുള്ളില്‍ തൂങ്ങി മരിച്ച നിലയില്‍ കാണപ്പെട്ട സംഭവവുമായി ബന്ധപ്പെട്ട് പോളിടെക്‌നിക് വിദ്യാര്‍ഥിയെ കിളിമാനൂര്‍ പൊലിസ് അറസ്റ്റ് ചെയ്തു.
കിളിമാനൂര്‍ പനപ്പാംകുന്ന് സ്വദേശിയും വട്ടിയൂര്‍ക്കാവ് പോളിടെക്‌നിക് വിദ്യാര്‍ഥിയുമായ ശ്രീറാം (21) ആണ് അറസ്റ്റിലായത്. ഇയാളെ കോടതി റിമാന്റ് ചെയ്തു.
കഴിഞ്ഞ മാസം 21ന് ആണ് കിളിമാനൂര്‍ ചെങ്കിക്കുന്നില്‍ കശുവണ്ടി ഫാക്ടറിക്ക് സമീപം പ്ലാവിള വീട്ടില്‍ സുനില്‍കുമാര്‍-രജനി ദമ്പതികളുടെ മകള്‍ കാവ്യാ സുനിലി (15) നെയാണ് വീടിനുള്ളില്‍ തൂങ്ങി മരിച്ചനിലയില്‍ കാണപ്പെട്ടത് .
കിളിമാനൂര്‍ ഗവ.എച്ച്.എച്ച്.എസി ലെ പത്താം ക്ലാസ് വിദ്യാര്‍ഥിനിയായിരുന്നു. പോസ്റ്റ്‌മോര്‍ട്ടം റിപ്പോര്‍ട്ടിന്റെ അടിസ്ഥാനത്തില്‍ പൊലിസ് നടത്തിയ അന്വേഷണത്തിലാണ് ശ്രീറാം (21) പിടിയിലായത്. ഇരുവരും ഒരു സ്‌കൂളില്‍ പഠിച്ചിരുന്നവരായിരുന്നു.
ഇയാള്‍ പെണ്‍കുട്ടിയെ നിരവധി തവണ ശാരീരികമായി പീഡിപ്പിച്ചിട്ടുണ്ടന്നും വിശദമായ പോസ്റ്റ്‌മോര്‍ട്ടം റിപ്പോര്‍ട്ട് കിട്ടിയശേഷം കൂടുതല്‍ അന്വേഷണം നടത്തുമെന്നും പൊലിസ് പറഞ്ഞു.