വാഷിങ്ടണ്‍: തിരക്കേറിയ റോഡില്‍ സിഗ്നല്‍ മാറുന്നതിനായി കാത്തുകിടന്ന വാഹനങ്ങള്‍ക്കുമുന്നിലേക്ക് പെട്ടന്നായിരുന്നു ചെറിയൊരു എഞ്ചിന്‍ വിമാനം പ്രത്യക്ഷപ്പെട്ടത്. ആകാശത്തുനിന്നും റോഡരികിലേക്ക് പറന്നിറങ്ങിയ വിമാനം നിമിഷനേരംകൊണ്ട് തീഗോളമായി മാറി.

വാഷിങ്ടണിലെ മക്ള്‍ടിയോയില്‍ മെയ് രണ്ടിനാണ് സംഭവം നടന്നത്. വിമാനം കത്തിയമര്‍ന്നെങ്കിലും അതിലുണ്ടായിരുന്ന യാത്രക്കാരും പൈലറ്റും ഗുരുതരമായ പരുക്കുകളില്ലാതെ രക്ഷപ്പെട്ടു.

തൊട്ടടുത്തുള്ള ഒരു വ്യോമ പരിധിയില്‍ നിന്നും പറന്നുയരാന്‍ ശ്രമിച്ച വിമാനത്തിന്റെ എഞ്ചിന്‍ തകരാറിലായതോടെ അടുത്തുള്ള ഒഴിഞ്ഞ പ്രദേശത്ത് പൈലറ്റ് ക്രാഷ് ലാന്‍ഡിന് ശ്രമിക്കുകയായിരുന്നു.

എന്നാല്‍ വളരെ താഴ്ന്നു പറന്ന വിമാനം റോഡരികിലെ വൈദ്യുത കമ്പിയില്‍ ഉരസി തീപിടിക്കുകയായിരുന്നു. വൈദ്യുതി കമ്പിയില്‍ തട്ടിയതിന് പിന്നാലെ വിമാനത്തിന്റെ ഇന്ധനടാങ്കില്‍ തീപിടിച്ചതാണ് അപകടത്തിന് കാരണം.

സിഗ്‌നല്‍ പോയിന്റില്‍ നിര്‍ത്തിയിട്ടിരുന്ന ഒരു കാറില്‍ ഘടിപ്പിച്ചിരുന്ന കാമറയാണ് ഈ ദൃശ്യം പകര്‍ത്തിയത്.