മങ്കൊമ്പ് :  ചമ്പക്കുളം ഗ്രാമപഞ്ചായത്തില്‍ പുന്നക്കുന്നത്ത് അനുമതിയില്ലാതെ നിലം നികത്തി സര്‍ക്കാര്‍ വിദേശമദ്യ വില്‍പ്പനശാല സ്ഥാപിക്കാനുള്ള നീക്കത്തിനെതിരെ രാഷ്ട്രീയ പാര്‍ട്ടികള്‍ക്കു പിന്നാലെ ജനപ്രതിനിധികളുടെ നേതൃത്വത്തില്‍ നാട്ടുകാരും രംഗത്തെത്തി.  പുഷ്പഗിരി ആശുപത്രിക്കു സമീപത്തു നടന്ന പ്രതിഷേധ യോഗത്തില്‍ സ്ത്രീകളും കുട്ടികളുമടക്കം നൂറുകണക്കിനാളുകള്‍ പങ്കെടുത്തു.  
ഗ്രാമപഞ്ചായത്ത് വൈസ് പ്രസിഡന്റ് മോളി അലക്‌സ് യോഗം ഉദ്ഘാടനം ചെയ്തു. രാമങ്കരി ഗ്രാമപഞ്ചായത്തംഗം സിബി മൂലംകുന്നം അധ്യക്ഷത വഹിച്ച യോഗത്തില്‍ വിവിധ രാഷ്ട്രീയ കക്ഷിനേതാക്കള്‍ പങ്കെടുത്തു. ഇപ്പോള്‍ നികത്തുന്ന സ്ഥലത്തോടു ചേര്‍ന്നുള്ള താല്‍ക്കാലിക കെട്ടിടത്തിലാണ് ഔട്‌ലറ്റ് സ്ഥാപിക്കാനുദ്യേശിക്കുന്നത്. ഈ കെട്ടിടം റവന്യു വകുപ്പിന്റെ നിര്‍ദ്ദിഷ്ട മാനദണ്ഡങ്ങള്‍ പാലിക്കാതെയാണ് നിര്‍മിച്ചിരിക്കുന്നതെന്ന് പ്രതിഷേധക്കാര്‍ ആരോപിക്കുന്നു.
കെട്ടിടം നിര്‍മിക്കുമ്പോള്‍ റോഡില്‍ നിന്നു പാലിക്കേണ്ട ദൂരപരിധി പാലിക്കപ്പെട്ടിട്ടില്ലന്നാണ് പ്രധാന ആക്ഷേപം. ബസ്‌റൂട്ടുള്ള റോഡില്‍ നിന്നും ഒരു മീറ്ററില്‍ താഴെ അകലത്തിലാണ് കെട്ടിടം നിര്‍മിച്ചിരിക്കുന്നത്. ഔട്‌ലറ്റ് പ്രവര്‍ത്തനമാരംഭിച്ചാല്‍ മദ്യം വാങ്ങാനെത്തുന്നവരുടെ ക്യൂ റോഡിലേക്കു  നീളുമെന്നതിനാല്‍ ഗതാഗതം തടസപ്പെടും.
ഇതിനു പുറമെ പ്രദേശത്തെ സമാധാന ജീവിതത്തിനു ഔട്‌ലറ്റ് തടസമാകുമെന്നും സമരക്കാര്‍ ആരോപിക്കുന്നു. കെട്ടിടത്തിനു തൊട്ടു മുന്‍വശത്തായിട്ടാണ് പുഷ്പഗിരി ആശുപത്രിയും പ്രവര്‍ത്തിക്കുന്നത്.
ബി.ജെ.പി  പഞ്ചായത്ത് വൈസ് പ്രസിഡന്റ് പങ്കജാക്ഷന്‍നായര്‍ രമനാമഠം, പുഷ്പഗിരി ആശുപത്രി അഡ്മിനിസ്‌ട്രേറ്റര്‍ റാണി ജോസഫ്, വി.എ ജോബ് വിരുത്തിക്കരി, ടി.ആര്‍ ബിജു, സിബിച്ച്ന്‍ പുരയക്കല്‍, എ.കെ ഷംസുദന്‍, സണ്ണിച്ചന്‍ മണത്തറ, ജോബി മണത്തറ, ജഗതകുമാരി, ടി.എസ് അഖില്‍ തുടങ്ങിയവര്‍ യോഗത്തില്‍ പ്രസംഗിച്ചു.  
ഔട്‌ലറ്റ് ആരംഭിക്കുന്നതിനായി നിലം നികത്തല്‍ ശ്രദ്ധയില്‍പെട്ടതിനെത്തുടര്‍ന്ന് കോണ്‍ഗ്രസ്, ബിജെപി പ്രവര്‍ത്തകര്‍ കഴിഞ്ഞ ദിവസം സ്ഥലത്ത് കൊടി കുത്തിയിരുന്നു. എന്നാല്‍ പിറ്റേന്നു തന്നെ കൊടികള്‍ അപ്രത്യക്ഷമായിരുന്നു.