കായംകുളം: സര്‍വീസ് സഹകരണ ബാങ്കിലെ സെക്യൂരിറ്റി ജീവനക്കാരനെ നാലംഗ സംഘം മര്‍ദിച്ചതായി പരാതി. ഇന്നലെ പുലര്‍ച്ചെ 2.30 ഓടെയാണ് സംഭവം.
പുതുപ്പള്ളി സര്‍വീസ് സഹകരണ ബാങ്കിന്റെ ഗോവിന്ദ മുട്ടം അമ്പലപ്പാട് ജംഗ്ഷനിലെ ശാഖയുടെ സെക്യൂരിറ്റി ജീവനക്കാരന്‍ ശശിമംഗലത്ത് ശശിധരന്‍ (56)നാണ് മര്‍ദനമേറ്റത്. വാക്കുതര്‍ക്കമാണ് മര്‍ദനത്തിന് കാരണമെന്ന് പൊലിസ് പറഞ്ഞു. ഇയാളെ കായംകുളം താലൂക്കാശുപത്രിയില്‍ പ്രവേശിപ്പിച്ചു. രണ്ട് ബൈക്കുകളിലായി എത്തിയ സംഘം സമീപത്തെ ഗോഡൗണിന് മുന്നില്‍ ബൈക്കുകള്‍ പാര്‍ക്ക് ചെയ്ത ശേഷം ബാങ്കിന് മുന്നിലേയ്ക്കുവന്നു. സംശയം തോന്നിയ ശശിധരന്‍ ഇവരെ ചോദ്യം ചെയ്തു. ഇതില്‍ കുപിതരായ സംഘം തന്നെ  ആക്രമിയ്ക്കുകയായിരുന്നുവെന്ന് ഇയാള്‍ പൊലിസിനോട് പറഞ്ഞു. മല്‍പിടുത്തത്തിനിടെ സംഘത്തിലെ ഒരാളുടെ മൊബൈല്‍ ഫോണ്‍ താഴെ വീണത് ശശിധരനു ലഭിച്ചു.
ഫോണ്‍ പിടിച്ചു വാങ്ങാന്‍ സംഘം ശ്രമിച്ചെങ്കിലും ശശിധരന്‍ നല്‍കിയില്ല. ഇത് പിന്നീട് പൊലിസിന് കൈമാറി.ബഹളം കേട്ട് സമീപവാസികള്‍ എത്തിയപ്പോഴേയ്ക്കും അക്രമികള്‍ ബൈക്കുകളില്‍ രക്ഷപെട്ടു. തലയ്ക്കും മുഖത്തുമാണ് ശശിധരന് പരുക്ക്. കായംകുളം പൊലിസ്  കേസെടുത്ത് അന്വേഷണം തുടങ്ങി .ഫോണ്‍ പരിശോധിച്ചു വരികയാണെന്നും അക്രമികളെ കുറിച്ച് സൂചന ലഭിച്ചതായും പൊലിസ് പറഞ്ഞു.