പാവറട്ടി: പാവറട്ടി സെന്റ് ജോസഫ് പളളി തിരുനാളിന് വെടിക്കെട്ട് ലൈസന്‍സിനുളള അപേക്ഷ നിരസിച്ചതായി ജില്ലാ കലക്ടര്‍ ഡോ.എ.കൗശിഗന്‍ അറിയിച്ചു. പൊതുജനങ്ങളുടെ ജീവനും സുരക്ഷയ്ക്കും ഭീഷണിയുളളതിനാലാണ് ലൈസന്‍സ് നിഷേധിച്ചത്.
അനധികൃത വെടിക്കെട്ട് നടക്കാതിരിക്കുവാന്‍ ജില്ലാ പൊലിസ് മേധാവി നടപടി സ്വീകരിക്കണമെന്ന് കലക്ടര്‍ നിര്‍ദേശിച്ചിട്ടുണ്ട്. വെടിക്കെട്ടു നടത്തുന്നതിന് ഉദ്ദേശിച്ച സ്ഥലത്തിന്റെ 100 മീറ്റര്‍ ചുറ്റളവില്‍ 17 വീടുകള്‍, കോണ്‍വെന്റ്, സ്‌കൂളുകള്‍, ഓഡിറ്റോറിയം, മറ്റു സ്ഥാപനങ്ങള്‍ സ്ഥിതി ചെയ്യുന്നുവെന്ന് ചാവക്കാട് തഹസില്‍ദാര്‍ റിപ്പോര്‍ട്ടു ചെയ്തിട്ടുണ്ട്.
കൂടാതെ എല്ലാ താമസക്കാരുടെയും സമ്മതപത്രങ്ങള്‍ ലഭിച്ചിട്ടില്ല. സ്‌ഫോടക വസ്തുക്കള്‍ സൂക്ഷിക്കുന്നതിന് ചട്ടപ്രകാരം ലൈസന്‍സോടുകൂടിയ മാഗസിനുകള്‍ ആവശ്യമാണ്. വെടിക്കെട്ട് സ്ഥലത്തു നിന്നു സുരക്ഷിതമായി ജനങ്ങളെ മാറ്റി നിര്‍ത്തുന്നതിനുളള സൗകര്യങ്ങള്‍ ഇല്ല.
അടിയന്തിര സാഹചര്യമുണ്ടായാല്‍ ജനത്തെ ഒഴിപ്പിക്കുന്നതിനോ സുരക്ഷിത സ്ഥാനത്തേക്ക് മാറ്റി നിര്‍ത്തുന്നതിനോ സൗകര്യമോ സ്ഥലമോ പളളി പരിസരത്ത് ഇല്ലെന്നും വെടിക്കെട്ടിന് അനുമതി നല്‍കേണ്ടതില്ലെന്നും ജില്ലാ പൊലിസ് മേധാവി അറിയിച്ചതായി കലക്ടര്‍ ചൂണ്ടിക്കാട്ടി.