ശ്രീനഗര്‍: കശ്മിരില്‍ ഭീകര്‍ക്കായുള്ള തെരച്ചിലിനുശേഷം മടങ്ങിയ സൈനിക വാഹനത്തിനുനേരെ ആക്രമണം. ഷോപ്പിയാനിലെ വിവിധ ഭാഗങ്ങളില്‍ തെരച്ചില്‍ നടത്തി മടങ്ങുമ്പോഴാണ് സൈനിക വാഹനത്തിനുനേരെ ആക്രമണമുണ്ടായത്.
സംഭവത്തില്‍ നാട്ടുകാരനായ ഒരാള്‍ കൊല്ലപ്പെട്ടു. രണ്ട് സൈനികര്‍ക്ക് പരുക്കേല്‍ക്കുകയും ചെയ്തു. സ്വകാര്യ വാഹനത്തിലെ ഡ്രൈവറായ നാസിര്‍ അഹമ്മദ് ഷെയ്ക്കാണ് മരിച്ചതെന്ന് പൊലിസ് അറിയിച്ചു.
സൈനിക വാഹനം കടന്നുപോകുമ്പോള്‍ രണ്ട് ഭാഗങ്ങളില്‍ നിന്നായിട്ടാണ് ഭീകരര്‍ ആക്രമണം നടത്തിയതെന്ന് പ്രതിരോധ വക്താവ് കേണല്‍ രാജേഷ് ഖാലിയ അറിയിച്ചു.
ഉടന്‍ തന്നെ സൈന്യം ശക്തമായി തിരിച്ചടിച്ചു. ഭീകരര്‍ ഒളിച്ചിരിക്കുന്ന സാഹചര്യത്തില്‍ പ്രദേശം വളഞ്ഞ് തെരച്ചില്‍ തുടരുകയാണെന്ന് പ്രതിരോധ വക്താവ് അറിയിച്ചു.