സുല്‍ത്താന്‍ ബത്തേരി: മൂന്നാര്‍, കുമളി സര്‍വിസുകള്‍ക്കായി രണ്ടു മാസങ്ങള്‍ക്ക് മുന്‍പ് സുല്‍ത്താന്‍ ബത്തേരി കെ.എസ്.ആര്‍.ടി.സി ഡിപ്പോയിലെത്തിച്ച ഡീലക്‌സ് ബസുകള്‍ ഇപ്പോഴും കട്ടപ്പുറത്ത് തന്നെ. ടൈം ഷെഡ്യൂള്‍ ലഭിക്കാത്തിന്റെ പേരില്‍ അഞ്ച് ഡീലക്‌സ് ബസുകളാണ് ഡിപ്പോയില്‍ തുരുമ്പെടുത്തു നശിക്കുന്നത്.
ബസുകള്‍ സര്‍വിസ് നടത്താത്തത് മൂലം ഒരു ദിവസം ശരാശരി രണ്ട് ഷെഡ്യൂളുകളിലുമായി എണ്‍പതിനായിരം രൂപയുടെ നഷ്ടമാണ്  കെ.എസ്.ആര്‍.ടി.സിക്ക് ഉണ്ടാകുന്നത്. രണ്ടുമാസം ബസ് നിര്‍ത്തിയിട്ടതോടെ 48 ലക്ഷത്തോളം രൂപയുടെ കലക്ഷനാണ് നഷ്ടപ്പെടുത്തിയത്. കെ.എസ്.ആര്‍.ടി.സി മാനേജമെന്റ് ജില്ലാ ഡിപ്പോയോട് ചെയ്യുന്ന ചിറ്റമ്മ നയമാണ് അതിന്റെ ഉദാഹരണമാണിതെന്നും ജില്ലാ ഗതാഗത സംരക്ഷണ സമിതി യോഗം കുറ്റപ്പെടുത്തി. യഥാ സമയത്ത് ടൈം ഷെഡ്യൂള്‍ നല്‍കാതെ കെ.എസ്.ആര്‍.ടി.സിക്ക് നഷ്ടമുണ്ടാക്കുന്ന ചീഫ് ഓഫിസിലെ ഉദ്യോഗസ്ഥര്‍ക്കെതിരെ കടുത്ത ശിക്ഷാ നടപടി സ്വീകരിക്കണമെന്നും ഉടന്‍ മൂന്നാര്‍ കുമളി റൂട്ടില്‍ ബസ് സര്‍വിസ് ആരംഭിക്കണമെന്നും അല്ലാത്ത പക്ഷം കോര്‍പ്പറേഷനെതിരെ പ്രക്ഷോപ പരിപാടി ആരംഭിക്കണമെന്നും ജില്ലാ ഗതാഗത സംരക്ഷണ സമിതിയുടെ അടിയന്തര യോഗം ആവശ്യപ്പെട്ടു. യോഗത്തില്‍ പി.എം തോമസ് അധ്യക്ഷനായി. മോഹന്‍ നവ്‌രംഗ്, സലീം കരുടന്‍കണ്ടി, പി.സി ജോര്‍ജ്ജ്, വി അബ്ദു, നാസര്‍ കാസിം, വിനയ കുമാര്‍, പി ശങ്കരന്‍, പി പ്രദീപ്, രാമകൃഷ്ണന്‍ സംസാരിച്ചു.