നടുവണ്ണൂര്‍:  കരുവണ്ണൂരില്‍ പുതുതായി ആരംഭിച്ച സിവില്‍ സപ്ലൈസ്് സംഭരണകേന്ദ്രത്തില്‍  കയറ്റിറക്കിന് 19 പ്രാദേശികതോഴിലാളികളെ നിയോഗിക്കാനും ഇനി വരുന്ന ഒഴിവുകളില്‍ പ്രാദേശിക തൊഴിലാളികളെ പരിഗണിക്കാനും തീരുമാനമായി.
എ.ഡി.എം റിജില്‍കുമാര്‍  ചേമ്പറില്‍ വിളിച്ചുചേര്‍ത്ത സംയുക്തസമരസമിതിനേതാക്കളുടേയും അനുബന്ധ ട്രേഡ് യൂനിയന്‍ നേതാക്കളുടേയും യോഗത്തിലാണ് ധാരണയായി.
നേരത്തെയുള്ള  കൊയിലാണ്ടി സംഭരണകേന്ദ്രത്തിലെ 65 തൊഴിലാളികളും 19 പ്രാദേശിക തൊഴിലാളികളും  ഉള്‍പ്പെടെ 84 പേര്‍ നാളെ മുതല്‍ കയറ്റിറക്ക് നടത്തും. കയറ്റിറക്ക് ജോലിയ്ക്ക് പ്രാദേശിക തൊഴിലാളികളെ നിയോഗിക്കണമെന്നാവശ്യപ്പെട്ടായിരുന്നു സംയുക്തസമരസമിതിയുടെ നേതൃത്വത്തില്‍ സമരം നടന്നത്.  ജില്ലാ ലാബര്‍ ഓഫിസര്‍ എന്‍.കെ പ്രഭാകരന്‍, താലൂക്ക് സപ്ലൈ  ഓഫിസര്‍ തുളസി, സപ്ലൈകോ കൊയിലാണ്ടി ഡിപ്പോ മാനേജര്‍ ശ്രീജ, നടുവണ്ണൂര്‍ ഗ്രാമപഞ്ചായത്ത് വൈസ് പ്രസിഡന്റ് പി. അച്യുതന്‍, സംയുക്തസമരസമിതി നേതാക്കളായ സജീവന്‍ നാഗത്ത്, കെ. ചന്തപ്പന്‍, ടി.എം ശശി, അഷ്‌റഫ് പുതിയപ്പുറം, വി.കെ സോമന്‍, എന്‍.ആലി, ടി. നിസാര്‍, എ.സി ഉമ്മര്‍, ബിജു ആന്റണി, വി.എം. ഗംഗാധരന്‍ എന്നിവരും ട്രേഡ് യൂനിയന്‍ നേതാക്കളായ പി. ഗോപാലന്‍, കെ. സുകുമാരന്‍, യു. പോക്കര്‍, ശ്രീനിവാസന്‍ ചര്‍ച്ചയില്‍ പങ്കെടുത്തു.