കോഴിക്കോട്: പ്ലസ് വണ്‍ പ്രവേശനത്തിന്റെ അപേക്ഷ നല്‍കുന്നത് മെയ് എട്ടിന് ആരംഭിക്കുന്ന സാഹചര്യത്തില്‍ ജില്ലയിലെ നാലിടത്ത് ഹെല്‍പ് ഡെസ്‌കുകള്‍ ആരംഭിക്കും.  
അപേക്ഷ നല്‍കുന്നതുമായി ബന്ധപ്പെട്ട സംശയങ്ങള്‍ക്ക് ഹയര്‍സെക്കന്‍ഡറി വകുപ്പിന്റെ കീഴില്‍ പ്രവര്‍ത്തിക്കുന്ന കരിയര്‍ ഗൈഡന്‍സ് അഡോളസന്‍സ് കൗണ്‍സിലിങ്ങ് സെല്ലിന്റെ നേതൃത്വത്തില്‍ ജില്ലയിലെ കോഴിക്കോട്, കൊയിലാണ്ടി, വടകര, താമരശ്ശേരി താലൂക്കുകകള്‍ കേന്ദ്രീകരിച്ചാണ് 'ഫോക്കസ് പോയിന്റ്' ഹെല്‍പ് ഡെസ്‌കുകള്‍ പ്രവര്‍ത്തനമാരംഭിക്കുക.
 ഏത് കോഴ്‌സ് തെരഞ്ഞെടുക്കണം, എങ്ങനെ അപേക്ഷിക്കണം എന്നീ ചോദ്യങ്ങള്‍ക്ക് ഉത്തരം നല്‍കാനാണ് ഹെല്‍പ് ഡെസ്‌ക് ആരംഭിക്കുന്നതെന്ന് കോര്‍ഡിനേറ്റര്‍ നാസര്‍ ചേലേരി 'സുപ്രഭാത'ത്തോട് പറഞ്ഞു.
എട്ട് മുതല്‍  22 വരെ ഓണ്‍ലൈനായി അപേക്ഷിക്കാം. മെയ് 29നാണ് ട്രയല്‍ അലോട്ട്‌മെന്റ്.  ജൂണ്‍ അഞ്ചിന് ആദ്യ അലോട്ട്‌മെന്റ് നടക്കും.  ജൂണ്‍ 14 നു ക്ലാസുകള്‍ തുടങ്ങാനുമാണ് തീരുമാനം.
അപേക്ഷ നല്‍കുന്നത് ഇങ്ങനെ: വരെമു.സലൃമഹമ.ഴീ്.ശി എന്ന ലിങ്ക് ഉപയോഗിച്ച് ഓണ്‍ലൈനായി പേഴ്‌സണല്‍ കമ്പ്യൂട്ടറിലോ, അക്ഷയ സെന്റര്‍, മറ്റ് ജനസേവ കേന്ദ്രങ്ങളില്‍ നിന്നും അപേക്ഷിക്കാം. ശേഷം ഫോമിന്റെ പ്രിന്റൗട്ട് എടുത്ത് ഏതെങ്കിലും ഹയര്‍സെക്കന്‍ഡറി സ്‌കൂളില്‍ 25 രൂപ ഫീസിനോടൊപ്പം നല്‍കുക.