കിഴിശ്ശേരി: കിഴിശ്ശേരിയില്‍ തെരുവ്‌നായയുടെ വിളയാട്ടം. പത്തോളം പേര്‍ക്ക് കടിയേറ്റു. ഇന്നലെ ഉച്ചക്ക് പന്ത്രണ്ടോടെ കിഴിശ്ശേരി കുഴിമണ്ണ സെക്കന്റ് സൗത്ത് പ്രദേശത്താണ് നായയുടെ പരാക്രമമുണ്ടായത്. മൂന്ന് കുട്ടികള്‍ അടക്കം പത്തോളം പേര്‍ക്ക് സാരമായി പരുക്കേറ്റിട്ടുണ്ട്.
സ്ത്രീകളും വീട്ടുമുറ്റത്ത് കളിച്ചു കൊണ്ടിരുന്ന കുട്ടികളും പള്ളിയില്‍ നിന്ന് നിസ്‌കാരം കഴിഞ്ഞ് വരുന്നവരും തെരുവുനായയുടെ പരാക്രമത്തിന് ഇരയായി. പി.സി ആയിശ സ്രാമ്പിക്കല്‍ (55), പി.കെ ഹംസ ഹാജി കുന്നത്ത് (75), അഫ്‌ന ഉമ്മര്‍ (നാല്), ഹിഷാം കുന്നംപള്ളി (ഏഴ്), ഷാഹിദ (35), റൈഹാന്‍ കുന്നംപള്ളി (അഞ്ച്) എന്നിവര്‍ക്കാണ് നായയുടെ പരാക്രമത്തില്‍ പരുക്കേറ്റത്. എല്ലാവരേയും മഞ്ചേരി മെഡിക്കല്‍ കോളജില്‍ പ്രവേശിപ്പിച്ചു.
മുഖത്തും കൈക്കും ഗുരുതരമായി പരുക്കേറ്റ നാലു വയസുകാരി അഫ്‌ന ഉമ്മറിനെ പിന്നീട് കോഴിക്കോട് സ്വകാര്യ ആശുപത്രിയിലേക്ക് മാറ്റി.