ചങ്ങരംകുളം: ഇരുപത്തി അഞ്ച് ലിറ്റര്‍ ഇന്ത്യന്‍ നിര്‍മിത വിദേശ മദ്യവുമായി ഒരാള്‍ പൊന്നാനി എക്‌സൈസിന്റെ പിടിയിലായി. പള്ളിക്കര സ്വദേശിയായ ചോഴീലത്ത് ഉണ്ണികൃഷ്ണനാണ് ഇന്നലെ രാത്രി വൈകി കുറ്റിപ്പാല, പൊന്നാനി, ചങ്ങരംകുളം എക്‌സൈസ് റെയ്ഞ്ച് ഉദ്യോഗസ്ഥരുടെ പിടിയിലായത്. ബിവറേജസ് ഔട്ട്‌ലറ്റുകള്‍ പൂട്ടിയതിനെ തുടര്‍ന്ന് ആവശ്യക്കാര്‍ വര്‍ധിച്ചതോടെ പ്രദേശത്ത് യുവാക്കളെ കേന്ദ്രീകരിച്ച് വന്‍ തോതില്‍ അനധികൃത മദ്യ വില്‍പന നടത്തുന്ന ഇയാള്‍ക്കെതിരേ നാട്ടുകാരും മുന്‍പ് പല തവണ പരാതി നല്‍കിയിരുന്നു. എന്നാല്‍ പല തവണ പരിശോധന നടത്തിയിരുന്നെങ്കിലും മദ്യം പിടിച്ചെടുക്കാനായിരുന്നില്ല. പ്രദേശത്തെ മദ്യ വില്‍പനയിലെ പ്രധാന കണ്ണിയാണ് ഉണ്ണികൃഷ്ണന്‍. കഴിഞ്ഞ ദിവസം പല മാര്‍ഗങ്ങളിലൂടെ കഞ്ചാവ് വില്‍പന നടത്തുന്നവരെ മൂന്ന് കിലോയിലധികം കഞ്ചാവുമായി എക്‌സൈസ് സംഘം പിടികൂടിയിരുന്നു. ഇതിന്റെ തുടച്ചയെന്നോണം കഞ്ചാവ് , മദ്യം എന്നിവ ലക്ഷ്യമാക്കി എക്‌സൈസ് നടത്തിയ അന്വേഷണത്തിലാണ് ഇയാള്‍ പിടിയിലായത്.