കൊല്ലം: ഒക്ടോബര്‍ വിപ്ലവത്തിന്റെ നൂറാം വാര്‍ഷികത്തിന്റെ ഭാഗമായി സി.പി.എം ജില്ലാ കമ്മിറ്റിയുടെ നേതൃത്വത്തില്‍കൊല്ലത്ത് റെഡ് വാളണ്ടിയര്‍ മാര്‍ച്ച് നടത്തുമെന്ന് ജില്ലാ സെക്രട്ടറി കെ.എന്‍ ബാലഗോപാല്‍ വാര്‍ത്താ സമ്മേളനത്തില്‍ അറിയിച്ചു. ഇന്നു വൈകിട്ട് മൂന്നിന് ക്യു.എ.സി മൈതാനിയില്‍ നിന്നാരംഭിക്കുന്ന പരേഡില്‍ ജില്ലയിലെ 17 ഏര്യാ കമ്മിറ്റികളില്‍ നിന്നായി 5000 റെഡ്‌വാളണ്ടിയര്‍മാര്‍ പങ്കെടുക്കും. ചിന്നക്കട റെയില്‍വേ മേല്‍പ്പാലം വഴി അഞ്ചിന് മാര്‍ച്ച് ആശ്രാമം മൈതാനത്ത് എത്തിച്ചേരും. തുടര്‍ന്നു സി.പി.എം ജനറല്‍ സെക്രട്ടറി സീതാറാം യെച്ചൂരി വാളണ്ടിയേഴ്‌സിന്റെ സല്യൂട്ട് സ്വീകരിക്കും. തുടര്‍ന്ന് അദ്ദേഹം സമ്മേളനം ഉദ്ഘാടനം ചെയ്യും. സംസ്ഥാന സെക്രട്ടറി കോടിയേരി ബാലകൃഷ്ണന്‍, പോളിറ്റ്ബ്യൂറോ അംഗം എം.എ ബേബി, മന്ത്രി ജെ മേഴ്‌സികുട്ടിഅമ്മ തുടങ്ങിയവര്‍ പങ്കെടുക്കും. ഡി.വൈ.എഫ് നേതാവ് എസ്.ഷബീറാണ് റെഡ്‌വാളണ്ടിയര്‍ പരേഡിന്റെ ജില്ലാ ക്യാപ്ടന്‍. അഞ്ചല്‍ ബ്ലോക്ക് പഞ്ചായത്ത് പ്രസിഡന്റ് രഞ്ചു സുരേഷ് വൈസ് ക്യാപ്ടനാണ്. ഒക്ടോബര്‍ വിപ്ലവത്തിന്റെ ഒരു വര്‍ഷം നീളുന്ന നൂറാം വാര്‍ഷികാഘോഷം 2016 നവംബര്‍ 7നാണ് സംസ്ഥാന കമ്മിറ്റിയുടെ നേതൃത്വത്തില്‍ ആരംഭിച്ചത്. സ്വാഗതസംഘം പ്രസിഡന്റ് കെ വരദരാജന്‍, സ്വാഗതസംഘം സെക്രട്ടറി എക്‌സ് ഏണസ്റ്റ്,കൊല്ലം ഏര്യാ സെക്രട്ടറി എ.എം ഇക്ബാല്‍ എന്നിവരും വാര്‍ത്താ സമ്മേളനത്തില്‍ പങ്കെടുത്തു.