പെരുമ്പാവൂര്‍: ശബരി റെയില്‍പാതക്കുള്ള സ്ഥലം ഏറ്റെടുക്കുകയോ അല്ലെങ്കില്‍ പദ്ധതി ഉപേക്ഷിക്കുകയോ ചെയ്യണമെന്നാവശ്യപ്പെട്ട് പൊന്നംവില ഓഫിസിന് മുന്നില്‍ സമരസമിതി ധര്‍ണ സംഘടിപ്പിച്ചു.
രണ്ട് ദശാബ്ദക്കാലമായി ഭൂവുടമകള്‍ അനുഭവിച്ച് വരുന്ന ബുദ്ധിമുട്ടുകളെ കണ്ടില്ലെന്ന് നടിക്കുന്ന സര്‍ക്കാര്‍ നിലപാടില്‍ പ്രതിഷേധിച്ചാണ് ധര്‍ണ സംഘടിപ്പിച്ചത്. വര്‍ഷങ്ങളായി അടഞ്ഞ് കിടക്കുന്ന പെരുമ്പാവൂരിലെ പൊന്നംവില ഓഫിസിന് മുന്നില്‍ നടത്തിയ ധര്‍ണ വിവരാവകാശ പ്രവര്‍ത്തകന്‍ ഗോപാലന്‍ വെണ്ടുവഴി ഉദ്ഘാടനം ചെയ്തു. പെരുമ്പാവൂര്‍ - മുവാറ്റുപുഴ എന്നിവിടങ്ങളില്‍ പ്രവര്‍ത്തിച്ചിരുന്ന പൊന്നംവില ഓഫിസുകള്‍ തുറന്ന് പ്രവര്‍ത്തിക്കുക, നഷ്ടപരിഹാരത്തിന്റെ ഒരു ഭാഗം മുന്‍കൂറായി നല്‍കുക, ഭൂവുടമകള്‍ക്കെതിരെയുള്ള നടപടികള്‍ അവസാനിപ്പിക്കുക, സര്‍ക്കാരിനാവശ്യമില്ലെങ്കില്‍ പദ്ധതി ഉപേക്ഷിക്കുക, ആവശ്യമെങ്കില്‍ സ്ഥലം ഏറ്റെടുത്ത് നഷ്ടപരിഹാരം നല്‍കുക എന്നീ ആവശ്യങ്ങള്‍ ധര്‍ണയില്‍ ഉന്നയിച്ചു.
സമരസമിതി കണ്‍വീനര്‍ എം.പി വിശ്വനാഥന്‍ നായര്‍ അധ്യക്ഷത വഹിച്ചു. മുഹമ്മദ് കറുപ്പാലി, സുല്‍ഫി കാഞ്ഞിരക്കാട്, കെ.ആര്‍ സുകുമാരി ടീച്ചര്‍, വി.ആര്‍ ശാന്തകുമാരി, കെ.ചന്ദ്രിക, കെ.എസ് ബേബി, വി.എസ് സിനി, പി.പ്രകാശന്‍, സാബു കോശി എന്നിവര്‍ സംസാരിച്ചു.