കുളു: ഹിമാചല്‍പ്രദേശില്‍ കാര്‍ കൊക്കയിലേക്ക് മറിഞ്ഞ് 11 പേര്‍ മരിച്ചു. കുളു ജില്ലയിലെ റാണിനല്ലയ്ക്കടുത്ത് റോഹ്ത്തങിനടുത്തായിരുന്നു അപകടം.
ചില വിനോദ സഞ്ചാരികളും തദ്ദേശീയരുമുള്‍പ്പെടെയുള്ള യാത്രക്കാര്‍ സഞ്ചരിച്ച ജിപ്‌സി വാഹനം റോഡിലെ മെറ്റലില്‍ നിന്ന് തെന്നി കൊക്കയിലേക്ക് മറിയുകയായിരുന്നു. അപകടത്തില്‍ അഞ്ച് സ്ത്രീകള്‍ ഉള്‍പ്പെടെ 11 പേര്‍ മരിച്ചതായി പൊലിസ് അറിയിച്ചു. കനത്ത മഞ്ഞുകാരണം രക്ഷാ പ്രവര്‍ത്തനം ശരിയായി നടത്താന്‍ കഴിയുന്നില്ല. ബുധനാഴ്ച രാത്രിയാണ് അപകടം നടന്നതെങ്കിലും വിവരം പുറം ലോകമറിഞ്ഞത് ഇന്നലെ രാവിലെ മാത്രമായിരുന്നു.