കോടഞ്ചേരി: മഹാ പ്രളയത്തില്‍ സര്‍വതും നഷ്ടപ്പെട്ടരെ സഹായിക്കാനിയി ദുരിതാശ്വാസ നിധിയിലേക്ക് കുടുക്കയില്‍ സൂക്ഷിച്ച പണം നല്‍കി കുരുന്നുകള്‍ മാതൃകയായി.
കോടഞ്ചേരി സെന്റ് ജോസഫ്‌സ് എല്‍.പി സ്‌കൂളില്‍ പഠിക്കുന്ന സഹോദരങ്ങളായ അന്നാ ജോ പോള്‍, ജൊഹാന്‍ ജോ പോളുമാണ് അവരുടെ സ്വപ്ന സമ്പാദ്യം ദുരിതാശ്വാസ പ്രവര്‍ത്തനങ്ങള്‍ക്കായി നല്‍കിയിരിക്കുന്നത്.
രണ്ട്‌പേരുടെയും സ്വപ്നമായ സൈക്കിള്‍ വാങ്ങുക എന്ന ലക്ഷ്യത്തോടെ കുടുക്കയില്‍ സൂക്ഷിച്ചിരുന്ന സമ്പാദ്യമാണ് മഹാപ്രളയത്തില്‍ ദുരിതമനുഭവിക്കുന്നവരെ സഹായിക്കുന്നതിനായി സ്‌കൂളില്‍ രൂപീകരിച്ച ദുരിതാശ്വാസ നിധിയിലേക്ക് നല്‍കിയത്.
കെ.എസ്.ഇ.ബി ജീവനക്കാരനായ പുല്ലുപറമ്പില്‍ ലിജോയുടെയും ജോയിസിയുടെയും മക്കളാണിവര്‍. പ്രളയ കെടുതികള്‍ ദൃശ്യമാധ്യമങ്ങളിലൂടെ കണ്ടറിഞ്ഞ ഇവര്‍ സ്വയമെടുത്ത തീരുമാനം രക്ഷിതാക്കളെ അറിയിക്കുകയായിരുന്നു.
പ്രകൃതിക്ഷോഭത്തില്‍ ദുരിതമനുഭവിക്കുന്നവര്‍ക്കായ് കൂടരഞ്ഞി അലിഫ് ഇംഗ്ലീഷ് സ്‌കൂളിലെ ദുരിതാശ്വാസ നിധി സ്‌കൂള്‍ അസി.ലീഡര്‍ ഫിസാന്‍ മുഹമ്മദ് ആറ്റുപുറത്ത് ഉസ്താദ് ദാരിമി ഇ.കെ കാവനൂരിനെ ഏല്‍പ്പിച്ചു.