മനാമ: ബഹ്‌റൈനില്‍ ഡ്രൈവറായി ജോലി ചെയ്യുന്ന മലയാളി ഉറക്കത്തില്‍ മരിച്ചു. മലപ്പുറം ജില്ലയിലെ മംഗലം പുറത്തൂര്‍ കാവഞ്ചേരി സ്വദേശി മേലത്തേ് പുതിയ മാളിയേക്കല്‍ ഷാഫി (46) ആണ് മരിച്ചത്. കഴിഞ്ഞ 25 വര്‍ഷത്തോളമായി ബഹ്‌റൈനിലുള്ള ഷാഫി ഇവിടെ വെസ്റ്റ് റിഫയിലെ ഒരു ബഹ്‌റൈനിയുടെ വീട്ടില്‍ ഡ്രൈവറായി ജോലി നോക്കുകയായിരുന്നു.

കഴിഞ്ഞ ദിവസം ഉറങ്ങാന്‍ കിടന്ന ശാഫിക്ക് പ്രത്യേക അസുഖമോ മറ്റോ ഇല്ലായിരുന്നുവെന്നും തങ്ങള്‍ വിളിച്ചുണര്‍ത്താന്‍ ശ്രമിച്ചപ്പോഴാണ് മരിച്ചതായി മനസിലായതെന്നും കൂടെ താമസിക്കുന്നവര്‍ പറഞ്ഞു.  മേലത്തേ് പുതിയ മാളിയേക്കല്‍ സെയ്തലവിയാണ് പിതാവ്. മാതാവ്: ഖദീജ.  ഭാര്യ: ജസീന. മക്കള്‍: ഷെറിന്‍, ശെയ്ഖ. എല്ലാവരും നാട്ടിലാണ്. മൃതദേഹം നാട്ടിലേക്ക് കൊണ്ടു പോകാനുള്ള നടപടികള്‍ പുരോഗമിക്കുകയാണ്.