തിരൂര്‍: വെള്ളപ്പൊക്കവും മഴക്കെടുതിയും മൂലം പഠനോപകരണങ്ങള്‍ നഷ്ടപ്പെട്ടവര്‍ക്ക് സമസ്ത കേരള ജംഇയ്യത്തുല്‍ മുഅല്ലിമീന്‍ വെസ്റ്റ് ജില്ലാ കമ്മിറ്റി ഖുര്‍ആന്‍ ഉള്‍പ്പെടെയുള്ള മദ്‌റസ പാഠപുസ്തകങ്ങള്‍ നല്‍കും. പ്രാദേശിക മദ്‌റസകള്‍ രേഖാമൂലം റെയ്ഞ്ച് കമ്മിറ്റികള്‍ മുഖേനയാണ് അപേക്ഷിക്കേണ്ടത്. ഇതുമായി ബന്ധപ്പെട്ട നിര്‍ദേശങ്ങള്‍ മേഖലാ കണ്‍വീനര്‍ മുഖേന നല്‍കുകയും ചെയ്തു. അടുത്ത മാസം മുതല്‍ ആരംഭിക്കുന്ന പാദ വാര്‍ഷിക പരീക്ഷകള്‍കൂടി കണക്കിലെടുത്താണ് എസ്.കെ.ജെ.എം കമ്മിറ്റി ഈ സംരംഭത്തിന് തുടക്കമിട്ടത്.പ്രസിഡന്റ് പുറങ്ങ് മൊയ്തീന്‍ മുസ്‌ലിയാര്‍, ജന. സെക്രട്ടറി പി.കെ അബ്ദുല്‍ ഖാദര്‍ ഖാസിമി, ട്രഷറര്‍ കെ.എം.എ റസാഖ് മൗലവി എന്നിവര്‍ പ്രസ്താവനയിലൂടെയാണ് ഇക്കാര്യമറിയിച്ചത്.