കൊല്ലം: തെരഞ്ഞെടുപ്പിന്റെ ഓരോഘട്ടത്തിലും ഹരിതചട്ടം പാലിക്കുന്നുവെന്ന് ഉറപ്പിക്കാന്‍ ഹരിതകര്‍മസേന രംഗത്ത്. പ്രചാരണ ഘട്ടത്തില്‍ തുടങ്ങിയ ജാഗ്രത തെരഞ്ഞെടുപ്പ് പ്രക്രിയ പൂര്‍ത്തിയാകും വരെ നടപ്പാക്കാനായി ജില്ലാ ശുചിത്വമിഷന്റെ നേതൃത്വത്തിലാണ് സേനാംഗങ്ങള്‍ പ്രവര്‍ത്തിക്കുന്നത്.
വോട്ടിങ് സാമഗ്രികളുടെ വിതരണ കേന്ദ്രങ്ങളില്‍ പത്തുവീതം ദേശീയസമ്പാദ്യ പദ്ധതി അംഗങ്ങളെ നിയോഗിച്ചാണ് പരിശോധന നടത്തിയത്. ഹരിത സൗഹൃദ വസ്തുക്കള്‍ മാത്രമാണ് എല്ലായിടത്തും ഉപയോഗിക്കുന്നത് എന്ന് ഉറപ്പ് വരുത്തി ആവശ്യമായ നിര്‍ദേശങ്ങളും നല്‍കി.
ഭക്ഷണ പദാര്‍ഥങ്ങളുടേയും മറ്റും അവശിഷ്ടം നിക്ഷേപിക്കാന്‍ പ്രത്യേകം ബിന്നുകള്‍ പോളിങ് കേന്ദ്രങ്ങളില്‍ സ്ഥാപിച്ചിട്ടുണ്ട്. വിതരണ കേന്ദ്രങ്ങളില്‍ നിന്നുള്ള ജൈവഅജൈവ മാലിന്യം സേനാംഗങ്ങള്‍ ശേഖരിച്ച് തദ്ദേശ സ്വയംഭരണ സ്ഥാപനങ്ങള്‍ക്ക് സംസ്‌കരിക്കുന്നതിനായി കൈമാറി.
ഫെസിലിറ്റേഷന്‍ സെന്ററുകള്‍ ജില്ലാതലം മുതല്‍ തദ്ദേശസ്ഥാപനങ്ങള്‍ വരെ പ്രവര്‍ത്തന സജ്ജമാക്കിയാണ് ഹരിതചട്ട പാലനം ഉറപ്പ് വരുത്തുന്നത് എന്ന് ശുചിത്വ മിഷന്‍ ജില്ലാ കോഡിനേറ്റര്‍ വ്യക്തമാക്കി.