പത്തനാപുരം: അടിക്കടി രാഷ്ട്രീയ സംഘര്‍ഷങ്ങളും മാവോയിസ്റ്റ് ഭീഷണിയും ഉണ്ടകാന്‍ സാധ്യതയുള്ള ജില്ലയുടെ കിഴക്കന്‍ മലയോര മേഖലയെ സമാധാനത്തോടെയും സുരക്ഷിതമായും പോളിങ് ബൂത്തുകളില്‍ എത്തിക്കുന്നതിനായി മൂന്നു കമ്പനി കേന്ദ്രസേന പത്തനാപുരത്ത് എത്തി.  96 അംഗങ്ങളടങ്ങിയ മൂന്ന് ബറ്റാലിയന്‍ സേനയും തിരുവനന്തപുരത്ത് നിന്നും കേരള പൊലിസിന്റെ സ്‌പെഷല്‍ ആംഡ് പൊലിസുമാണ് എത്തിയത്. പത്തനാപുരം, പുനലൂര്‍, കുന്നിക്കോട് തുടങ്ങിയ മേഖലകളില്‍ ഇവര്‍ റൂട്ട് മാര്‍ച്ചും നടത്തി. അടിക്കടി രാഷ്ട്രീയ സംഘര്‍ഷങ്ങള്‍ ഉണ്ടാകുന്ന മേഖലയില്‍ കേന്ദ്രസേനയെ വിന്യസിക്കണമെന്ന് ആവശ്യപ്പെട്ട് വിവിധ സംഘടനകള്‍ തെരഞ്ഞെടുപ്പ് കമ്മിഷനും ഉന്നത പൊലിസ് അധികൃതര്‍ക്കും പരാതി നല്‍കിയിരുന്നു.  പുനലൂര്‍ ഡിവൈ.എസ്.പി സതീഷ് കുമാറിന്റെ നേതൃത്വത്തിലാണു വിവിധയിടങ്ങളിലായി സേനയെ വിന്യസിക്കും. അക്രമം നടത്തുന്നവര്‍ക്കെതിരേ മുഖം നോക്കാതെ നടപടിയെടുക്കാനാണ് പൊലിസ് നിര്‍ദേശം നല്‍കിയിരിക്കുന്നത്.  തെരഞ്ഞെടുപ്പിന്റെ സുഖമമായ നടത്തിപ്പിനായി കേന്ദ്രസേനയുടെ സേവനം ലഭിച്ചത് പൊലിസിനും ആശ്വാസം പകര്‍ന്നിട്ടുണ്ട്.