പാലക്കാട് : ജനാധിപത്യം സംരക്ഷിക്കാന്‍ നെന്മാറ അസംബ്ലി മണ്ഡലത്തിലെ നെല്ലിയാമ്പതിയിലെ എട്ടുപേര്‍ മാത്രമുള്ള ബൂത്തില്‍ വോട്ട് ചെയ്യാന്‍ എല്ലാ സംവിധാനവും ഒരുക്കിയിരിക്കുകയാണ് തെരഞ്ഞെടുപ്പ് കമ്മിഷന്‍. ജില്ലയില്‍ ആകെയുള്ള 2,110 ബൂത്തുകളില്‍ കുറഞ്ഞവോട്ടര്‍മ്മാരുള്ളത് ആലത്തൂര്‍ പാര്‍ലിമെന്റിലെ നെന്മാറ നിയോജമണ്ഡലത്തിലെ നെല്ലിയാമ്പതി റോസറി എസ്റ്റേറ്റ് ബൂത്തിലാണ്. ബൂത്ത് നമ്പര്‍ 145ല്‍ ആകെ നാല് സ്ത്രീകളും നാല് പുരുഷന്മാരുമായി എട്ടുപേരാണുളളത്്.
നാല് വീട്ടുനമ്പറുകളിലായുള്ളവരാണ് ഈ എട്ടുപേരും. മനോഹരന്‍,കണ്ണമ്മ മനോരഞ്ജിനിയും ഒരു വീട്ടില്‍നിന്നും ,പാപ്പാ,ലക്ഷ്മി,അറുമുഖന്‍ എന്നിവര്‍ മറ്റൊരു വീട്ടില്‍നിന്നുമാണ്. ചിന്നന്‍,രാജന്‍,എന്നിവര്‍ ഒറ്റയ്ക്ക് ഓരോ വീടുകളില്‍ താമസിക്കുന്നതുമായാണ് വോട്ടര്‍ പട്ടിക പ്രകാരമുളളത്്. ഇവരുടെ വോട്ടുകള്‍ പെട്ടിയിലാക്കാന്‍ പോളിങ് ഓഫീസര്‍ ബൈജുവിന്റെ നേതൃത്വത്തില്‍ ആറംഗസംഘം ഇന്നലെ രാവിലെ പതിനൊന്നരയോടെ വാഹനത്തില്‍ നെല്ലിയാമ്പതി മലകയറി.രാവിലെ ഏഴ് മുതല്‍ വൈകീട്ട് ആറ് വരെയാണ് പോളിങ്. ഇവിടത്തെ വോട്ടുകള്‍ മുഴുവന്‍ പോളിംഗ് സമയത്തിന് മുന്‍പ് കഴിഞ്ഞാലും ഇവര്‍ക്ക് വൈകിട്ട് വരെ കാത്തിരിക്കേണ്ടി വരും.