അശ്‌റഫ് കൊണ്ടോട്ടി

കൊണ്ടോട്ടി: ഇസ്‌ലാംമത പ്രബോധന പ്രവര്‍ത്തനങ്ങളുടെ ഏകോപനത്തിന് സമസ്തക്ക് കീഴീല്‍ കൊണ്ടോട്ടിയില്‍ സയ്യിദ് ഉമറലി ശിഹാബ് തങ്ങള്‍ സ്മാരക സുന്നിമഹല്‍ ഒരുങ്ങുന്നു. സമസ്തക്കും കീഴ്ഘടങ്ങള്‍ക്കും ആസ്ഥാനമായാണ് മൂന്ന് നിലയില്‍ വിപുലമായ സൗകര്യങ്ങളോടെ സുന്നിമഹല്‍ കെട്ടിടം നിര്‍മിച്ചത്. സുന്നുമഹല്ലിന്റെ ഉദ്ഘാടനം 27,28,29 തിയതികളില്‍ ചെറുശ്ശേരി ഉസ്താദ് നഗറില്‍ നടക്കും. 27ന് വൈകിട്ട് 4.30ന് കബീര്‍ ബാഖവി കാഞ്ഞാര്‍ പ്രഭാഷണം നടത്തും. 28ന് വൈകിട്ട് 4.30ന് പാണക്കാട് സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്യും. സമസ്ത പ്രസിഡന്റ് സയ്യിദ് ജിഫ്‌രി മുത്തുക്കോയ തങ്ങള്‍ അധ്യക്ഷനാകും. ജനറല്‍ സെക്രട്ടറി കെ. ആലിക്കുട്ടി മുസ്‌ലിയാര്‍ മുഖ്യപ്രഭാഷണം നടത്തും. 29ന് ഉച്ചക്ക് രണ്ടിന് കുടുംബ സംഗമവും മജ്‌ലിസുന്നൂര്‍ ആത്മീയ സദസിനും ഷാജഹാന്‍ റഹ്മാനി കംബ്ലക്കാട് നേതൃത്വം നല്‍കും.
കൊണ്ടോട്ടി ബൈപാസ് റോഡിന് സമീപത്തായാണ് മൂന്ന് നിലകളില്‍ സുന്നിമഹല്‍ നിര്‍മിച്ചിരിക്കുന്നത്. താഴെ നിലയില്‍ സമസ്തയുടേയും കീഴ്ഘടങ്ങളുടേയും ഓഫിസുകളും, ചെറുശ്ശേരി ഉസ്താദ് ഖുതുബ്ഖാനയും, എസ്.കെ.പി.എം തങ്ങള്‍ സ്മാരക ഓഡിറ്റോറിയവും പ്രവര്‍ത്തിക്കും. മറ്റു നിലകളില്‍ റിലീഫ് സെല്ല്, നിസ്‌കാര ഹാള്‍, പലിശരഹിത ബാങ്ക്, ജനറല്‍ ഓഡിറ്റോറിയം, ഇബാദ് ദഅ്‌വാ സെല്‍, മയ്യത്ത് പരിപാലന കേന്ദ്രം, ഖുര്‍ആന്‍ പഠന കേന്ദ്രം, മജ്‌ലിസുന്നൂര്‍ ആത്മീയ സദസ്, ഖുര്‍ആന്‍ പ്രതിവാര പ്രഭാഷണം, എംപ്ലോയ്‌മെന്റ് കോച്ചിങ് സെന്റര്‍, ട്രെന്‍ഡ് വിദ്യാഭ്യാസ ഗൈഡന്‍സ് സെന്റര്‍ തുടങ്ങിയവ പ്രവര്‍ത്തിക്കും.
കൊണ്ടോട്ടി ആസ്ഥാനമായി കരിപ്പൂര്‍, കുഴിമണ്ണ, മൊറയൂര്‍ പ്രദേശങ്ങളെ ഉള്‍പ്പെടുത്തിയാണ് സുന്നി മഹല്‍ പ്രവര്‍ത്തിക്കുക. സംസ്ഥാനത്ത് സമസ്തയുടെ പ്രധാന ഇന്‍ഫര്‍മേഷന്‍ സെന്ററായും സുന്നി മഹല്‍ പ്രവര്‍ത്തിക്കും. സ്വദേശത്തും വിദേശത്തുമുള്ള ഉദാരമതികളായ ദീനി സ്‌നേഹികളുടെ സഹായത്തോടെയാണ് സുന്നിമഹല്‍ കൊണ്ടോട്ടിയില്‍ നിര്‍മിച്ചിരിക്കുന്നത്.
ബി.എസ്.കെ തങ്ങള്‍, സി.എ മുഹമ്മദ് മുസ്‌ലിയാര്‍, എം.വി അബ്ദുല്‍ കരീം മുസ്‌ലിയാര്‍, ഷാജഹാന്‍ റഹ്മാനി കംബ്ലക്കാട്, കെ.എസ് ഇബ്രാഹീം മുസ്‌ലിയാര്‍, പി.എ ജബ്ബാര്‍ ഹാജി, എം.അബൂബക്കര്‍ ഹാജി, കുഞ്ഞാന്‍ ദാരിമി, നാസറുദ്ദീന്‍ ദാരിമി, കോപ്പിലാന്‍ അബു ഹാജി, ഉമര്‍ ഫാറൂഖ് കരിപ്പൂര്‍, ശിഹാബ് കുഴിഞ്ഞൊളം, ഹുസ്സന്‍കുട്ടി ചെറുമുറ്റം, അന്‍വര്‍ കൊട്ടപ്പുറം, ജലീല്‍ ഒളവട്ടൂര്‍, ബാവുഹാജി കൊണ്ടോട്ടി തുടങ്ങിയ സമസ്തയുടേയും പോഷകഘടകങ്ങളുടേയും ഭാരവാഹികള്‍ ഉള്‍പ്പെട്ട വിപുലമായ സ്വഗാത സംഘമാണ് ഉദ്ഘാന ചടങ്ങിന് നേതൃത്വം നല്‍കുന്നത്.