ചെറുപുഴ: പെരിങ്ങോം ടൗണില്‍ പലചരക്ക് കട കത്തിനശിച്ചു. ഇന്നലെ പുലര്‍ച്ചെ അഞ്ചോടെയാണ് സംഭവം. കരക്കാട്ടെ പാണ്ട്യാല പ്രകാശന്റെ ഉടമസ്ഥതയിലുള്ള അമ്മൂസ് വെജിറ്റബിള്‍സ് ആന്‍ഡ് സ്റ്റേഷനറി സ്റ്റോര്‍ ആണ് കത്തിനശിച്ചത്.
കടയ്ക്കുള്ളിലുണ്ടായിരുന്ന ഫ്രിഡ്ജ് ഉള്‍പ്പെടെ കത്തിനശിച്ചു. ഓണം, പെരുന്നാള്‍ പ്രമാണിച്ച് കടയില്‍ കൂടുതല്‍ സാധനങ്ങള്‍ ശേഖരിച്ചിരുന്നു.
പുലര്‍ച്ചെ നടക്കാനിറങ്ങിയവര്‍ കടയില്‍നിന്ന് പുക ഉയരുന്നത് കണ്ട് വിവരം ഫയര്‍ഫോഴ്‌സിനെ അറിയിക്കുകയായിരുന്നു.
ഫയര്‍ഫോഴ്‌സ് എത്തിയപ്പോഴേക്കും കടയ്ക്കുള്ളിലെ മുഴുവന്‍ സാധനങ്ങളും ഉപകരണങ്ങളും കത്തിനശിച്ചു.
ഷോര്‍ട്ട് സര്‍ക്യൂട്ടാണ് തീപിടിക്കാന്‍ കാരണമെന്നാണ് കരുതുന്നത്. പെരിങ്ങോം വില്ലേജ് ഓഫിസിനോട് ചേര്‍ന്നുള്ള കടയാണ് കത്തിനശിച്ചത്. രണ്ട് ലക്ഷത്തിലേറെ രൂപയുടെ നഷ്ടം കണക്കാക്കുന്നു.