മുള്ളേരിയ: വീണ്ടും കാട്ടാനകള്‍ നാട്ടിലിറങ്ങിയതോടെ കര്‍ഷകരുടെ ജീവനും സ്വത്തും ഭീഷണിയില്‍. കഴിഞ്ഞ രണ്ടുദിവസമായി ദേലംപാടി പഞ്ചായത്തിലെ വിവിധയിടങ്ങളിലെ കൃഷിയിടങ്ങളിലിറങ്ങിയ കാട്ടാനകളുടെ വിളയാട്ടത്തില്‍ തരിച്ചു നില്‍ക്കുകയാണ് പ്രദേശവാസികള്‍.
രണ്ടുദിവസം മുന്‍പ് കാട്ടാനകളെ വനം വകുപ്പ് അധികൃതര്‍ തുരത്തിയെങ്കിലും ഇന്നലെ വീണ്ടും ഇവ കൃഷിയിടങ്ങളിലെത്തി.
ഇന്നലെയും കാട്ടാനകളെ തുരത്തിയിട്ടുണ്ടെങ്കിലും അവ കാടുകയറിയിട്ടില്ലെന്നാണ് കര്‍ഷകര്‍ പറയുന്നത്.
ദേലംപാടി പഞ്ചായത്തിലെ അഡൂര്‍ പാണ്ടി, ബെള്ളച്ചേരി, നെച്ചിപടുപ്പ്, ചാമക്കൊച്ചി തുടങ്ങിയ സ്ഥലങ്ങളിലെ കൃഷിയിടങ്ങളിലാണ് കാട്ടാനകളുടെ വിളയാട്ടം. പാണ്ടിയിലെ അബ്ദുല്ല, മോഹനന്‍, നന്ദകുമാര്‍, പാണ്ടി കയ്യോണിയിലെ കേശവറാവ് തുടങ്ങി നിരവധി കര്‍ഷകരുടെ കൃഷിയിടത്തില്‍ ഇറങ്ങിയ കാട്ടാനക്കൂട്ടം ആയിരത്തോളം വാഴകളും കവുങ്ങ്, തെങ്ങുകളുമാണ് നശിപ്പിച്ചത്. കൃഷിയിടങ്ങളില്‍ ജലസേചനത്തിനായി ഉപയോഗിക്കുന്ന പൈപ്പ്, സ്പ്രിങ്ക്‌ളറുകള്‍ എന്നിവ കാട്ടാനകള്‍ പിഴുതെറിഞ്ഞു.
രണ്ടു ദിവസമായി കര്‍ണാടക വനമേഖലയില്‍നിന്നിറങ്ങിയ കുട്ടി ആന ഉള്‍പ്പെടെ പത്ത് കാട്ടാനകളാണ് രണ്ടു കൂട്ടങ്ങളായി നാടിനെ വിറപ്പിക്കുന്നത്. കഴിഞ്ഞ ദിവസം കാര്‍ഷിക മേഖലയില്‍ ഇറങ്ങിയ ആനക്കൂട്ടത്തെ വനം വകുപ്പ് അധികൃതരായ കെ.വി ജയപ്രകാശ്, ബി.വി രാജഗോപാല്‍, എന്‍.വി സത്യന്‍, എന്‍. അനില്‍ കുമാര്‍, എം. ഗോപാലന്‍, കെ. മധുസൂദനന്‍ എന്നിവരുടെ നേതൃത്വത്തില്‍ പന്തം കെട്ടിയും പടക്കം പൊട്ടിച്ചും വിരട്ടി ഓടിച്ചുവെങ്കിലും ഇന്നലെ രാവിലെ വീണ്ടും കൃഷിയിടങ്ങളില്‍ എത്തി. മാത്രമല്ല, കാട്ടാനക്കൂട്ടം ജനങ്ങള്‍ക്ക് നേരെ തിരിഞ്ഞതായും കര്‍ഷകര്‍ പറയുന്നു.
ആനകളെ തുരത്താന്‍ വേണ്ടി കൃഷിയിടത്തില്‍ ആനകള്‍ കയറുന്ന സ്ഥലത്ത് തീയിട്ടതോടെ ആനകള്‍ വിരണ്ടോടിയെങ്കിലും വനത്തിനുള്ളില്‍ കയറാന്‍ സാധ്യതയില്ലെന്നാണ് കര്‍ഷകര്‍ പറയുന്നത്. ദിവസങ്ങള്‍ക്ക് മുന്‍പ് ഇവിടെനിന്നു കിലോമീറ്ററുകള്‍ അകലെയുള്ള കര്‍ണാടക അതിര്‍ത്തിയിലെ കാട്ടികജെയിലെ കോളനിയിലെ ജനവാസകേന്ദ്രത്തില്‍ എത്തിയ ആനക്കൂട്ടം വ്യാപകമായി കൃഷി നശിപ്പിച്ചിരുന്നു.
ആനകളെ തുരത്തി ഓടിക്കുന്നതിന് ശാശ്വത പരിഹാരം വേണമെന്നാണ് കര്‍ഷകരുടെ ആവശ്യം.