പത്തനംതിട്ട: വനംവകുപ്പിന്റെ കസ്റ്റഡിയിലിരിക്കെ ദുരൂഹസാഹചര്യത്തില്‍ മരിച്ച് ഫാം ഉടമ മത്തായിയുടെ കേസ് സി.ബി.ഐക്ക് കൈമാറാന്‍ ഹൈക്കോടതി നിര്‍ദേശം. മത്തായിയുടെ ഭാര്യ സമര്‍പ്പിച്ച ഹരജി പരിഗണിച്ചാണ് നിര്‍ദേശം. അന്വേഷണം സിബിഐക്ക് കൈമാറാന്‍ തീരുമാനിച്ചതായി സര്‍ക്കാര്‍ അറിയിച്ച പശ്ചാത്തലത്തിലാണ് ഇക്കാര്യത്തില്‍ ഹൈക്കോടതി തീരുമാനമെടുത്തത്.

മൃതദേഹം മറവുചെയ്യാന്‍ ഹൈക്കോടതി നിര്‍ദേശം ഇതുവരെയും ആരെയും കസ്റ്റഡിയിലെടുക്കാത്തതെന്താണെന്ന് കോടതി സര്‍ക്കാരിനോട് ചോദിച്ചു.അതേസമയം മൃതദേഹം മറവുചെയ്യാത്തതെന്തുകൊണ്ടാണെന്ന് കോടതി ഹരജിക്കാരോട് ചോദിച്ചു. സംസ്‌കാരത്തിന് വേണ്ടത് ചെയ്യണമെന്ന് ഹൈക്കോടതി മത്തായിയുടെ ഭാര്യയോട് പറഞ്ഞു.ജൂലൈ 28ന് മരിച്ച മത്തായിയുടെ മൃതദേഹം ഇതുവരെ സംസ്‌കരിച്ചിട്ടില്ല.

ചിറ്റാറില്‍ തെളിവെടുപ്പിനിടെയാണ് മത്തായി കിണറ്റില്‍ വീണ് മരിച്ചത്. വനംവകുപ്പിന്റെ ക്യാമറ നശിപ്പിച്ചെന്ന കേസിലാണ് മത്തായിയെ കസ്റ്റഡിയിലെടുത്തത്. മരണത്തില്‍ ദുരൂഹതയുണ്ടെന്ന് അന്ന് തന്നെ ബന്ധുക്കള്‍ ആരോപിച്ചിരുന്നു. കുറ്റക്കാര്‍ക്കെതിരെ നടപടിയെടുക്കാതെ മൃതദേഹം സംസ്‌കരിക്കില്ലെന്നും ബന്ധുക്കള്‍ നിലപാടെടുത്തു. സംഭവത്തില്‍ വിശദമായ അന്വേഷണം ആവശ്യമാണെന്ന് വ്യക്തമാക്കിയ ഹൈക്കോടതി പത്തനംതിട്ട എസ്പിയോട് വിശദീകരണം തേടിയിരുന്നു.