ശ്രീഗനഗര്‍: ജമ്മുകശ്മീരിലെ വിഘടനവാദി സംഘടനകളുടെ ബഹിഷ്‌കരണാഹ്വാനവും ആക്രമണ സാധ്യതയും നലനില്‍ക്കുന്ന അനന്ത്‌നാഗ് മണ്ഡലത്തില്‍ പോളിങ് സമയം തുടങ്ങി മൂന്നുമണിക്കൂര്‍ പിന്നിട്ടിട്ടും ഒരു വോട്ട് പോലും രേഖപ്പെടുത്താതെ പോളിങ് ബത്തുകളും. 10 മണി ആയപ്പോഴേക്കും മണ്ഡലത്തില്‍ രണ്ടുശതമാനം പോളിങ് മാത്രമാണ് രേഖപ്പെടുത്തിയതെന്നാണ് റിപ്പോര്‍ട്ട്. ഇതോടൊപ്പം പോളിങ് നടക്കുന്ന കേരളമുള്‍പ്പെടെയുള്ള സംസ്ഥാനങ്ങളിലെ പോളിങ് ശതമാനം പത്തുമണിയായപ്പോഴേക്കും 15ഉം 20ഉം ശതമാനം ആയിരിക്കെയാണ് അനന്ത്‌നാഗിലെ ദുരവസ്ഥ.

10.30 വരെ ഖാഹ് ബസാറില്‍ 4, മലക് നാഗ്- എയില്‍ 5, മലക് നാഗ്- ബിയില്‍ 1, ഹസ്‌റത്ത് ബാല്‍-എയില്‍ 2, ഹസ്‌റത്ത് ബാല്‍-ബിയില്‍ 1 എന്നിങ്ങനെയാണ് പോളിങ് കണക്ക്. 10.30 വരെ ബിജിബെഹറയിലെ എട്ടു ബൂത്തുകളില്‍ 78 വോട്ടുകള്‍ മാത്രമാണ് രേഖപ്പെടുത്തിയത്. ഇവിടെ 40, 39, 38 ബൂത്തുകളിലായി 27 വോട്ടുകള്‍ മാത്രമെ 10 മണിവരെ പോള്‍ചെയ്തുള്ളൂ. വോട്ടെടുപ്പ് പ്രമാണിച്ച് ശക്തമായ സുരക്ഷാസന്നാഹമാണ് മണ്ഡലത്തില്‍ ഒരുക്കിയിട്ടുള്ളത്. മൊബൈല്‍, ഇന്റര്‍നെറ്റ് സംവിധാനങ്ങള്‍ക്കു കടുത്ത നിയന്ത്രണമേര്‍പ്പെടുത്തിയിട്ടുണ്ട്.

മുന്‍ മുഖ്യമന്ത്രിയും പി.ഡി.പി നേതാവുമായ മഹ്ബൂബാ മുഫ്തിയുള്‍പ്പെടെ 18 സ്ഥാനാര്‍ത്ഥികളാണ് മണ്ഡലത്തില്‍ നിന്നു ജനവിധിതേടുന്നത്. പി.ഡി.പിയുടെ കോട്ടയായി അറിയപ്പെടുന്ന അനന്ത്‌നാഗില്‍ നിന്ന് 65,000 വോട്ടുകള്‍ക്കാണ് 2014ല്‍ മഹ്ബൂബ തെരഞ്ഞെടുക്കപ്പെട്ടത്. 2016ല്‍ പിതാവ് മുഫ്തി മുഹമ്മദ് സഈദിന്റെ നിര്യാണത്തെത്തുടര്‍ന്ന് മഹ്ബൂബ എം.പി സ്ഥാനം രാജിവച്ചതോടെ മണ്ഡലത്തില്‍ സുരക്ഷാകാരണങ്ങളാല്‍ ഇതുവരെ ഉപതെരഞ്ഞെടുപ്പ് നടന്നിരുന്നില്ല. മണ്ഡലത്തില്‍ ആകെ 13,97,272 വോട്ടര്‍മാരാണുള്ളത്.