ലണ്ടന്‍: കളിക്കളത്തില്‍ താരങ്ങളുടെ മോശം പെരുമാറ്റത്തിന് തടയിടാന്‍ പ്രീമിയര്‍ ലീഗ് ഒരുങ്ങുന്നു. ടൂര്‍ണമെന്റിനെ ആഗോള പ്രശസ്തിയിലേക്ക് നയിക്കുന്നതിന്റെ ഭാഗമായാണ് പുതിയ നടപടി. പ്രീമിയര്‍ ലീഗിലെ 20 ക്ലബുകളെയും ഇതിന്റെ ഭാഗമായി ലീഗധികൃതര്‍ സന്ദര്‍ശിച്ചിട്ടുണ്ട്.

കളിക്കാര്‍ തമ്മിലുള്ള സംഘര്‍ഷങ്ങള്‍, പ്രകോപനപരമായ സംഭാഷണങ്ങള്‍, കോച്ചും റഫറിമാരും തമ്മിലുള്ള സംഘര്‍ഷങ്ങള്‍ എന്നിവയുടെ ദൃശ്യങ്ങള്‍ പ്രീമിയര്‍ ലീഗ് അധികൃതര്‍ ടീമുടമകളെ കാണിച്ചിരുന്നു.

ഇത്തരം നടപടികള്‍ ഒഴിവാക്കാന്‍ ക്ലബിലെ താരങ്ങള്‍ക്കും കോച്ചിനും പ്രത്യേക നിര്‍ദേശങ്ങള്‍ നല്‍കണം. പെരുമാറ്റ മികവിന്റെ കാര്യത്തില്‍ ലോകത്തെമ്പാടുമുള്ള ഫുട്‌ബോള്‍ കാണികള്‍ക്ക് പ്രീമിയര്‍ ലീഗ് മാതൃകയാവണമെന്നും ഇതിലൂടെ ടൂര്‍ണമെന്റിന്റെ ആഗോള പ്രശസ്തിയാണ് ലക്ഷ്യമിടുന്നതെന്നും പ്രീമിയര്‍ ലീഗ് ചീഫ് എക്‌സിക്യൂട്ടീവ് റിച്ചാര്‍ഡ് സ്‌കുഡാമോര്‍ പറഞ്ഞു.