തൊടുപുഴ: സംസ്ഥാനത്തെ പൊതുമേഖലയിലെ ആദ്യ കുപ്പിവെള്ളം 'ഹില്ലി അക്വ' പൂര്‍ണതോതില്‍ വിപണിയിലേക്ക്. 300 മില്ലി ലിറ്ററും രണ്ടുലിറ്ററുമാണ് വിപണിയിലെത്തുന്നത്. ഒരുലിറ്റര്‍ മുന്‍പുതന്നെ വിപണിയില്‍ എത്തിച്ചിരുന്നു. ഒരുലിറ്ററിന് 15 രൂപയാണ് വിലയെങ്കില്‍ രണ്ടുലിറ്ററിനു 20 രൂപയും 300 മില്ലി ലിറ്ററിനു 10 രൂപയുമാണ് വില. കുപ്പിവെള്ളം രണ്ടാഴ്ചയ്ക്കുള്ളില്‍ മൊത്തവിതരണക്കാരില്‍ എത്തുമെന്ന് മാനേജിങ് ഡയരക്ടര്‍ പി. അനില്‍കുമാര്‍ സുപ്രഭാതത്തോട് പറഞ്ഞു.

നിലവില്‍ നിയമസഭയിലും സെക്രട്ടേറിയറ്റിലും കെ.ടി.ഡി.സിയിലും മറ്റു സര്‍ക്കാര്‍ സ്ഥാപനങ്ങളിലും ഒരുലിറ്ററിന്റെ  'ഹില്ലി അക്വ' കുപ്പിവെള്ളം ലഭ്യമാണ്. ഇതേസമയം രണ്ടുലിറ്ററിന്റെ കുപ്പിവെള്ളം ആശുപത്രി, കെ.എസ്.ആര്‍.ടി.സി അടക്കമുള്ള സ്ഥാപനങ്ങളുമാണ് ലക്ഷ്യം വയ്ക്കുന്നത്.

കുപ്പികളുടെ നിര്‍മാണം മുതല്‍ പാക്കിങ് വരെ പൂര്‍ണമായും യന്ത്രവല്‍കൃതമാണ്. 9.86 കോടി രൂപ ചെലവഴിച്ചാണ് കുപ്പിവെള്ള യൂനിറ്റ് സ്ഥാപിച്ചിട്ടുള്ളത്. അത്യാധുനിക നിലവാരമുള്ള പ്ലാന്റില്‍നിന്ന് സാന്‍ഡ് ഫില്‍ട്രേഷന്‍, റിവേഴ്‌സ് ഓസ്‌മോസിസ്, ഓസോണൈസേഷന്‍ തുടങ്ങി വിവിധഘട്ടങ്ങള്‍ പിന്നിട്ട് ഓട്ടോമാറ്റിക് സംവിധാനങ്ങളിലൂടെ കരസ്പര്‍ശമേല്‍ക്കാതെയാണ് 'ഹില്ലി അക്വ' വിപണിയിലെത്തുന്നത്.