കോഴിക്കോട്: ജില്ലയിലെ ഖനന പ്രവര്‍ത്തനങ്ങള്‍ക്ക് ക്ലിയറന്‍സ് നല്‍കുന്നതുമായി ബന്ധപ്പെട്ട ജില്ലാതല കമ്മിറ്റികള്‍ നിലവില്‍ വന്നു. അഞ്ചു ഹെക്ടറോ അതില്‍ താഴെയോ ഉള്ള പ്രദേശങ്ങളിലെ ഖനന പ്രവര്‍ത്തനങ്ങളുടെ പരിസ്ഥിതി ആഘാതം വിലയിരുത്തുന്നതിനും ഖനന അനുമതി ആവശ്യപ്പെട്ടുള്ള അപേക്ഷകളില്‍ തീരുമാനമെടുക്കുന്നതിനുമുള്ള ഡിസ്ട്രിക്ട് എന്‍വിയോണ്‍മെന്റ് ഇംപാക്ട് അസെസ്‌മെന്റ് അതോറിറ്റി (ഡി.ഇ.ഐ.എ.എ), ഡിസ്ട്രിക്ട് എക്‌സ്പര്‍ട്ട് അപ്രൈസല്‍ കമ്മിറ്റി (ഡി.ഇ.എ.സി) എന്നിവയാണ് നിലവില്‍ വന്നത്.
കേന്ദ്ര പരിസ്ഥിതി-വനം-കാലാവസ്ഥാ വ്യതിയാന മന്ത്രാലയത്തിന്റെ നിര്‍ദേശപ്രകാരമാണിത്. ജില്ലാ കലക്ടര്‍ ഡി.ഇ.ഐ.എ.എയുടെ ചെയര്‍മാനും സബ് ഡിവിഷനല്‍ മജിസ്‌ട്രേറ്റ് മെമ്പര്‍ സെക്രട്ടറിയുമാണ്. ഡിവിഷനല്‍ ഫോറസ്റ്റ് ഓഫിസര്‍, റിട്ട. ഡെപ്യൂട്ടി കണ്‍സര്‍വേറ്റര്‍ ഓഫ് ഫോറസ്റ്റ് എ. സത്യനാഥന്‍ എന്നിവരാണ് അംഗങ്ങള്‍. ഇറിഗേഷന്‍ വിഭാഗം സീനിയര്‍ എക്‌സിക്യൂട്ടീവ് എന്‍ജിനീയര്‍ ചെയര്‍പേഴ്‌സനും ജില്ലാ ജിയോളജിസ്റ്റ് അംഗം സെക്രട്ടറിയുമായാണ് ഡി.ഇ.എ.സി രൂപീകരിച്ചിരിക്കുന്നത്. കമ്മിറ്റികളുടെ പ്രഥമ യോഗം ജില്ലാ കലക്ടര്‍ എന്‍. പ്രശാന്തിന്റെ അധ്യക്ഷതയില്‍ കലക്ടറേറ്റ് ചേംബറില്‍ ചേര്‍ന്നു.