സ്വന്തം ലേഖകന്‍
കല്‍പ്പറ്റ: ചെറുകിട നാമമാത്ര കര്‍ഷക പെന്‍ഷന്‍ പദ്ധതിയില്‍ 10,296 കൃഷിക്കാരെ കൂടി ഉള്‍പ്പെടുത്തുന്നതിനു അനുമതി നല്‍കി സര്‍ക്കാര്‍ ഉത്തരവായി. കൃഷി ഡയരക്ടറുടെ ശുപാര്‍ശ കണക്കിലെടുത്താണ് ഉത്തരവ്. നിലവില്‍ 60 വയസ് പൂര്‍ത്തിയായ കൃഷിക്കാരെയാണ് പദ്ധതി ഗുണഭോക്താക്കളാക്കുന്നത്. സംസ്ഥാനത്ത് 2.5 ഏക്കറില്‍ കൃഷിസ്ഥലം കൈവശമുള്ള കര്‍ഷകരെയാണ് ചെറുകിട നാമമാത്ര കര്‍ഷകരുടെ ഗണത്തില്‍പ്പെടുത്തുന്നത്.
കാര്‍ഷികോല്‍പാദനം വര്‍ധിപ്പിക്കുന്നതിന് ഊന്നല്‍ നല്‍കുന്നതോടൊപ്പം കര്‍ഷകക്ഷേമവും ഉറപ്പാക്കുകയെന്ന നയത്തിന്റെ ഭാഗമായാണ് രണ്ട് ഹെക്ടര്‍ വരെ കൃഷി ഭൂമിയുള്ള ചെറുകിട നാമമാത്ര കര്‍ഷകര്‍ക്ക് പ്രതിമാസം 1,000 രൂപ നിരക്കില്‍ പെന്‍ഷന്‍ അനുവദിച്ചത്. രണ്ട് ഹെക്ടറോ അതില്‍ താഴെയോ കൃഷി ഭൂമിയുളള 60 വയസ്സ് പൂര്‍ത്തിയായ ചെറുകിട നാമമാത്ര കര്‍ഷകര്‍ക്കാണ് പദ്ധതിപ്രകാരം പെന്‍ഷന്‍ ലഭിക്കുന്നതിന് അര്‍ഹതയുള്ളത്. കുറഞ്ഞത് 10 വര്‍ഷമെങ്കിലും കാര്‍ഷിക വൃത്തിയില്‍ വ്യാപൃതനായിരിക്കേണ്ടതും കൃഷി മുഖ്യ ജീവനോപാധിയാക്കിയ ആളുമാകണം അപേക്ഷകന്‍. മറ്റു ക്ഷേമ പദ്ധതികളില്‍ ആനുകൂല്യം ലഭിക്കുന്നവര്‍ക്ക് പദ്ധതിപ്രകാരം പെന്‍ഷന് അര്‍ഹതയുണ്ടാവില്ല. നെല്ല്, തെങ്ങ്, പച്ചക്കറി, കിഴങ്ങുവര്‍ഗങ്ങള്‍, സുഗന്ധവിളകള്‍ തുടങ്ങിയ ഏതുവിളകളും കൃഷി ചെയ്യുന്ന കര്‍ഷകര്‍ക്ക് പദ്ധതി പ്രകാരം ആനുകൂല്യം ലഭിക്കും. 60 വയസ് പൂര്‍ത്തിയാകുന്ന മുറക്ക് പുതിയ അര്‍ഹരായ അംഗങ്ങളെയും പദ്ധതിയില്‍ ഉള്‍പ്പെടുത്തും. ഈ രീതിയിലാണ് സംസ്ഥാനത്ത് 10, 296 ചെറുകിട നാമമാത്ര കര്‍ഷകരെ കൂടി പെന്‍ഷന്‍ പദ്ധതിയില്‍ ഉള്‍പ്പെടുത്തിയത്.